Të paktën 10 palestinezë të tjerë u arrestuan në bastisjet e reja ushtarake izraelite në Bregun Perëndimor të pushtuar, sipas grupeve për çështjet e të burgosurve.
Të arrestuarit u morën në paraburgim në qytetet Hebron, Bethlehem, Nablus, Qalqilya, Tubas dhe Ramallah, tha në një deklaratë të përbashkët Komisioni i Çështjeve të të Burgosurve dhe Shoqata Palestineze e të Burgosurve.
“Bastisjet u karakterizuan nga abuzime, kërcënime ndaj të arrestuarve dhe familjeve të tyre, dhe akte vandalizmi e shkatërrimi në shtëpitë e qytetarëve”, shtoi ai.
Sipas deklaratës, forcat izraelite morën në pyetje rreth 100 palestinezë në kampin e refugjatëve Fawwar në qytetin jugor të Hebronit.
Arrestimet e reja e çuan numrin e palestinezëve të ndaluar nga ushtria izraelite në Bregun Perëndimor që nga tetori i vitit të kaluar në mbi 12.100, përfshirë ata që u liruan pasi u arrestuan, sipas shifrave palestineze.
Shifra nuk përfshin të arrestuarit nga Rripi i Gazës, numri i të cilëve vlerësohet të jetë në mijëra.
Gjatë viteve të fundit, ushtria izraelite ka kryer bastisje të rregullta në Bregun Perëndimor, të cilat janë përshkallëzuar me fillimin e luftës në Gaza më 7 tetor 2023. Palestinezët gjithashtu janë sulmuar dhunshëm nga kolonët e paligjshëm izraelitë.
Të paktën 824 palestinezë janë vrarë dhe mbi 6.500 të tjerë janë plagosur nga zjarri i ushtrisë izraelite në territorin e pushtuar, sipas Ministrisë së Shëndetësisë.
Përshkallëzimi vjen pas një opinioni historik në korrik të Gjykatës Ndërkombëtare të Drejtësisë që shpalli "të paligjshëm" pushtimin prej dekadash të tokës palestineze nga Izraeli dhe kërkoi evakuimin e të gjitha vendbanimeve ekzistuese në Bregun Perëndimor dhe Jerusalemin Lindor.
