Ushtria izraelite arreston 25 palestinezë të tjerë në Bregun Perëndimor

Forcat e ushtrisë izraelite arrestuan 25 palestinezë të tjerë në bastisjet e natës në Bregun Perëndimor të pushtuar, sipas grupeve për çështjet e të burgosurve të enjten. Arrestimet u kryen në qytetet Ramallah, Jerusalem, Tulkarm, Jenin dhe Salfit, tha në një deklaratë të përbashkët Komisioni i Çështjeve të të Burgosurve dhe Shoqëria Palestineze e të Burgosurve. Arrestimet e reja sollën në 7.845 numrat e palestinezëve të arrestuar nga ushtria izraelite në Bregun Perëndimor që nga tetori i kaluar, sipas shifrave palestineze. Tensionet kanë qenë të larta në të gjithë Bregun Perëndimor që kur Izraeli nisi një ofensivë ushtarake vdekjeprurëse kundër Rripit të Gazës pas një sulmi ndërkufitar nga Hamasi më 7 tetor 2023. Sipas Ministrisë së Shëndetësisë më shumë se 450 palestinezë janë vrarë që atëherë dhe rreth 4.700 të tjerë janë plagosur nga zjarri i ushtrisë izraelite në territorin e pushtuar. Izraeli akuzohet për gjenocid në Gjykatën Ndërkombëtare të Drejtësisë, e cila në një vendim të përkohshëm në janar urdhëroi Tel Avivin të ndalojë aktet gjenocidale dhe të marrë masa për të garantuar ofrimin e ndihmës humanitare për civilët në Gaza, ku janë vrarë afro 32.500 njerëz.