Ushtria izraelite të mërkurën mbrëma sulmoi Spitalin Al-Shifa në qytetin e Gazës për herë të dytë në më pak se 24 orë.
Agjencia zyrtare palestineze e lajmeve Wafa tha se buldozerët dhe automjetet ushtarake izraelite bastisën kompleksin spitalor nga hyrja e tij jugore.
Qëllimi i bastisjes së tij nuk ishte ende i qartë.
Më herët të mërkurën, ushtria izraelite u tërhoq nga brenda spitalit pasi e bastisi atë në mëngjes, por mbajti rrethimin e tij, duke parandaluar çdo lëvizje brenda kompleksit.
Tanket dhe automjetet ushtarake të ushtrisë izraelite kanë rrethuar spitalin gjatë javës së kaluar.
Autoritetet izraelite kanë thënë vazhdimisht se spitali përdoret si qendër komanduese ushtarake nga grupi Hamas, një akuzë që ende nuk është provuar dhe është mohuar fuqishëm nga grupi i Hamasit.
I themeluar në vitin 1948, Spitali Al-Shifa është spitali më i madh në Gaza me një kapacitet prej 500-700 shtretërish.
Zyra qeveritare për media në Gaza tha në një deklaratë se ushtria izraelite deri më tani ka shënjestruar 52 qendra shëndetësore dhe 55 ambulanca, ndërsa 25 spitale kanë mbetur pa shërbim për shkak të bombardimeve ose mungesës së karburantit dhe furnizimeve mjekësore.
Që nga 7 tetori, të paktën 11.500 palestinezë janë vrarë, duke përfshirë mbi 7.800 gra dhe fëmijë, dhe më shumë se 29.200 të tjerë janë plagosur, sipas shifrave të fundit nga autoritetet palestineze.
Mijëra ndërtesa, duke përfshirë spitale, xhami dhe kisha, janë dëmtuar ose shkatërruar gjithashtu në sulmet e pamëshirshme ajrore dhe tokësore të Izraelit në enklavën e rrethuar.
Ndërkohë, numri i të vdekurve izraelitë është rreth 1.600.
