Një libanez u vra dhe shtatë të tjerë u plagosën në një sulm të ushtrisë izraelite të hënën, ndërsa banorët u përpoqën të ktheheshin në zonat e tyre në jug të vendit, tha Ministria e Shëndetësisë.
Deklarata e Ministrisë tha se një person u vra dhe dy u plagosën në qytetin e Odaisseh, pastaj dy në Bani Haiyyan, një në Yaroun dhe dy të tjerë në Houla.
Në sulmet e djeshme izraelite, 24 persona u vranë dhe 134 u plagosën gjatë përpjekjeve të civilëve të zhvendosur për t'u kthyer në fshatrat e tyre në jug të vendit.
Tensionet u përshkallëzuan pasi ushtria izraelite mbeti në territorin libanez pas skadimit të një afati 60-ditor për t'u tërhequr nga jugu.
Shtëpia e Bardhë njoftoi se Izraeli dhe Libani kanë rënë dakord të zgjasin afatin për tërheqjen e forcave izraelite deri më 18 shkurt.
Agjencia shtetërore e lajmeve libaneze raportoi të hënën të paktën gjashtë shkelje të reja të armëpushimit nga Izraeli.
Një armëpushim i brishtë ka qenë në fuqi që nga 27 nëntori, duke u dhënë fund një periudhe të bombardimeve të ndërsjella midis Izraelit dhe grupit Hezbollah, e cila filloi më 8 tetor 2023 dhe u përshkallëzua në konflikt në shkallë të plotë më 23 shtator të vitit të kaluar.
Sipas kushteve të armëpushimit, Izraeli ishte i detyruar t’i tërhiqte forcat e tij në jug të Linjës Blu, kufirit de facto, në faza, ndërsa ushtria libaneze do të vendosej në Libanin jugor brenda 60 ditëve.
Të dhënat nga Ministria e Shëndetësisë libaneze tregojnë se që nga fillimi i ofensivës izraelite kundër Libanit më 8 tetor 2023, të paktën 4.080 njerëz janë vrarë, përfshirë gra, fëmijë dhe punonjës shëndetësorë, ndërsa 16.753 njerëz janë plagosur.
