Duke përsëritur thirrjen e tij për një armëpushim në Gaza, ministri i Jashtëm kinez Wang Yi bëri thirrje të martën për një bashkëpunim më të fortë me Türkiyen për një zgjidhje të qëndrueshme për Palestinën.
“Një armëpushim duhet të arrihet sa më shpejt në Gaza. Rruga për të dalë nga çështja palestineze është një zgjidhje me dy shtete. Kina dhe Türkiye mbështesin anëtarësimin e Palestinës në Kombet e Bashkuara (OKB)”, tha Wang në një konferencë të përbashkët shtypi me homologun turk Hakan Fidan në Pekin.
Më herët, Wang dhe Fidan zhvilluan bisedime dypalëshe në kryeqytetin kinez.
Ministri i Jashtëm i Kinës tha se Pekini dhe Ankaraja duhet të forcojnë koordinimin e ndërsjellë dhe të përshpejtojnë përpjekjet e tyre për të arritur një zgjidhje të drejtë dhe të qëndrueshme për çështjen palestineze sa më shpejt të jetë e mundur.
"Kina dhe Türkiye duhet të forcojnë bashkëpunimin, të kundërshtojnë të gjitha llojet e hegjemonisë dhe politikës së pushtetit dhe të rrisin qeverisjen globale në një nivel të drejtë", tha Wang.
Fidan tha në konferencën e përbashkët për shtyp se marrëdhëniet midis Türkiyes dhe Kinës do të kontribuojnë në paqen, prosperitetin dhe stabilitetin rajonal dhe global. Ai theksoi rëndësinë e qyteteve Kashgar dhe Urumqi në Kinë, duke theksuar rolin e tyre në botën kino-turke dhe kino-islame.
Shefi i diplomacisë turke, Hakan Fidan, ndodhet për një vizitë zyrtare treditore në Kinë, ku nga e hëna zhvilloi takime të nivelit të lartë me zyrtarë kinezë.
Ai u prit nga Han Zheng, nënkryetar i Kinës dhe anëtar i Byrosë Politike të Komitetit Qendror të Partisë Komuniste.
Pas Pekinit, ministri i Jashtëm turk pritet të vizitojë qytetet kineze Urumqi dhe Kashgar më vonë të martën, ku do të qëndrojë deri të mërkurën.
Marrëdhëniet diplomatike midis Türkiyes dhe Kinës u vendosën në vitin 1971 dhe marrëdhëniet dypalëshe u ngritën në nivelin e bashkëpunimit strategjik në vitin 2010.
