Zyra humanitare e OKB-së tha të martën se raportet nga terreni tregojnë se më shumë se 110.000 persona të zhvendosur kanë lënë kampet në Goma, në pjesën lindore të Republikës Demokratike të Kongos.
Ata kanë filluar të zhvendosen drejt fshatrave në territoret Masisi, Rutshuru dhe Nyiragongo, ku nuk ka luftime, tha zëdhënësi Jens Laerke gjatë një konference për shtyp të OKB-së në Gjenevë.
"Sidoqoftë, partnerët mbeten të shqetësuar nga ultimatumi 72-orësh i dhënë nga përfaqësuesit e M23 dy ditë më parë për të zhvendosurit që jetojnë në kampe dhe qendra kolektive në Goma që të largohen dhe të kthehen në fshatrat e tyre," tha Laerke.
Ai theksoi se "të gjitha kthimet duhet të jenë vullnetare dhe të ndodhin në kushte të sigurta, të informuara dhe me dinjitet, në përputhje me ligjin humanitar ndërkombëtar."
Gjithashtu, ai shprehu shqetësimin për çmontimin e paplanifikuar të kampeve për të zhvendosurit, që po çon në humbjen e infrastrukturës humanitare në to, përfshirë objektet e ujit, qendrat shëndetësore dhe qendrat për trajtimin e kolerës. "Kjo sjell humbje të mëdha të investimeve humanitare dhe zvogëlim të kapaciteteve të përgjigjes," shtoi ai.
OKB-ja vlerëson ndikimin e pezullimit të ndihmës në Jemen
Laerke, duke iu përgjigjur një pyetjeje nga Anadolu, tha se OKB-ja po vlerëson ndikimin e pezullimit të operacioneve humanitare në Jemen pas ndalimit të disa anëtarëve të stafit të saj.
"Jemi duke shqyrtuar në këtë moment se çfarë ndikimi do të ketë ky pezullim i fundit në operacionet tona në Jemen," tha ai.
I pyetur për sasinë e ndihmave të dërguara para pezullimit, Laerke tha se nuk kishte shifra të sakta, por shtoi se ato do të analizoheshin për të vlerësuar ndikimin e pezullimit.
Të hënën, OKB-ja njoftoi një pezullim të përkohshëm të të gjitha operacioneve në provincën Sa'ada të Jemenit, pas ndalimit të disa punonjësve të saj nga Houthit.
Sekretari i Përgjithshëm i OKB-së, António Guterres, udhëzoi agjencitë e OKB-së të ndalonin aktivitetet për shkak të "mungesës së kushteve dhe garancive të nevojshme të sigurisë", sipas një deklarate nga zyra e tij.
"Kjo masë e jashtëzakonshme dhe e përkohshme synon të balancojë imperativin për të qëndruar dhe për të ofruar ndihmë me nevojën për të garantuar sigurinë e personelit të OKB-së dhe partnerëve të saj," thuhet në deklaratë.
OKB-ja i bëri thirrje Houthive të sigurojnë lirimin e stafit të ndaluar, duke theksuar se pezullimi i operacioneve do të lejojë kohë "për të organizuar lirimin e personelit të ndaluar arbitrarisht dhe për të siguruar kushtet e nevojshme për ofrimin e ndihmave humanitare jetike."
