Në Ditën Ndërkombëtare të Diasporës, ministri i Shtetit për Marrëdhëniet me Parlamentin, Taulant Balla, priti në një takim Këshillin Kombëtar të Diasporës.
Rëndësia e mësimdhënies së gjuhës shqipe për fëmijët me prindër shqiptarë kudo në botë, si një mënyrë për ta ruajtur identitetin kombëtar ishte tema kryesore e këtij takimi.
Ministri shqiptar Balla u shpreh se "Ne duhet t’i garantojmë mundësinë çdo fëmije me të paktën një prind shqiptar të mësojë gjuhën shqipe dhe duhet t'i shfrytëzojmë mundësitë e komunikimit digjital për mësimin e shqipes onlajn. Rrjetet sociale duhet të shfrytëzohen për mësimdhënie."
Përfaqësuesve të Këshillit Kombëtar të Diasporës, të kryesuar nga Mark Gjonaj, ministri i informoi se, gjatë këtij viti, qeveria ka realizuar me sukses fazën e parë të programit "Mësues për Diasporën" në Greqi dhe synon ta zgjerojë këtë model në vende të tjera me komunitete shqiptare.
Në përfundim të takimit, u theksua angazhimi për ta forcuar bashkëpunimin me diasporën në promovimin e mësimit të gjuhës shqipe dhe në fusha të tjera si ekonomia dhe turizmi, ku diaspora mund të luajë një rol të rëndësishëm.
