Eksporti i Shqipërisë në Kosovë u rrit për 7,8 milionë euro në janar dhe shkurt, krahasuar me të njëjtën periudhë të një viti më parë.
Sipas raportit të publikuar nga Instituti i Statistikave të Shqipërisë INSTAT, mbi tregtinë e jashtme, eksportet drejt Kosovës gjatë periudhës janar-shkurt ishin mbi 31 milionë euro, nga 23 milionë euro sa ishin në 2-mujorin e 2021-shit.
Ndërkohë, edhe importet për 2-mujorin shënuan rritje me rreth 4,3 milionë euro, duke arritur në mbi 8,5 milionë euro.
Eksportet kryesore të Shqipërisë drejt Kosovës përfaqësohen nga eksporti i materialeve të ndërtimit dhe metaleve, mineraleve dhe lëndëve djegëse, ushqimeve si dhe produkteve kimike dhe plastike.
Të rëndësishme në strukturën e eksporteve shfaqen prodhimet vendase të drurit, mobilierisë si ndenjëset (karrige e kolltukë) ose mobilie të tjera.
