Komuniteti mysliman i Gjermanisë po përballet me një rritje të racizmit dhe diskriminimit, paralajmëroi të hënën një grup udhëheqës i të drejtave të njeriut.
"Ne po shohim një rritje alarmante të sulmeve dhe diskriminimit anti-mysliman," tha Guzin Ceylan i Aleancës Kundër Islamofobisë dhe Urrejtjes Anti-Myslimane (CLAIM) në një konferencë shtypi në Berlin.
Sipas saj, në vitin 2023 kanë dokumentuar të paktën 1.926 incidente anti-myslimane, pra më shumë se pesë incidente çdo ditë. Ajo theksoi se numri i sulmeve raciste është rritur me rreth 114 për qind krahasuar me një vit më parë.
Incidentet e raportuara përfshinin qindra abuzime verbale dhe kërcënime të drejtuara ndaj myslimanëve, 178 sulme fizike, katër tentativa për vrasje, pesë zjarrvënie dhe 93 raste vandalizmi dhe dëmtimi të pronës.
Ceylan tha se numri i krimeve të urrejtjes kundër myslimanëve në Gjermani është rritur ndjeshëm që nga përshkallëzimi i konfliktit izraelito-palestinez në tetor të vitit të kaluar.
Ajo shtoi se ata dokumentuan të paktën 679 incidente anti-myslimane midis tetorit dhe dhjetorit, por vuri në dukje se shifrat e vërteta mund të jenë shumë më të larta, pasi shumë viktima nuk paraqesin padi penale tek autoritetet.
“Ne supozojmë se shumë raste nuk raportohen, sepse shumë nga këto viktima kanë humbur besimin në institucionet për shkak të debateve të vazhdueshme politike dhe diskursit mediatik”, tha Ceylan, duke iu referuar mbulimit të njëanshëm mediatik të ngjarjeve të fundit dhe përgjithësimeve negative kundër myslimanëve.
Një vend me mbi 84 milionë banorë, Gjermania ka popullsinë e dytë më të madhe myslimane në Evropën Perëndimore pas Francës. Sipas të dhënave zyrtare, në Gjermani jetojnë rreth pesë milionë myslimanë.
