Institutit i Shëndetësisë Publike i Republikës së Kosovës ka bërë të ditur se nuk ka asnjë rast të dyshimtë për sa i përket “mpox” dhe se nuk ka vend për panik, por për kujdes.
Ministria e Shëndetësisë e Kosovës ka njoftuar qytetarët e saj se po e monitoron me vëmendje epidemiologjinë e mpox që nga paraqitja e rasteve të para të këtij viti në kontinentin e Afrikës.
“Jemi në komunikim të vazhdueshëm me OBSh-në dhe ECDC-në, për vlerësimin e rrezikshmërisë dhe rekomandimeve për masat që duhet ndërmarrë për sëmundjen në fjalë. Në laboratorët e IKShPK-së janë në dispozicion reagensët për testimin e rasteve të dyshimta!
IKShPK-ja po monitoron situatën epidemiologjike në bashkëpunim me SHSKUK-në”, lajmëroi Instituti Kombëtar i Shëndetësisë i Kosovës.
Në njoftim të IKShK-së u kërkohet profesionistëve shëndetësorë të rrisin vëmendjen për simptomat e sëmundjes, ndërsa këshillon qytetarët të drejtohen për te mjeku për çdo dyshim në lidhje me simptomat të sëmundjes.
E ashtuquajtura “Lia e majmunit” në gjuhën popullore, epidemiologjia e “mpox” është shpallur emergjencë globale për shëndetin publik, për herë të dytë brenda dy vitëve, nga Organizata Botërore e Shëndetësisë (OBSh), të mërkurën më 14 gusht të këtij viti.
OBSh-ja vjen me këtë vendim menjëherë pas përhapjes së këtij virusi në Republikën Demokratike të Kongos, si dhe në vendet fqinje, sikurse në Burundi, Kenia, Ruandë dhe Ugandë.
17.000 raste të infektimit me mpox dhe 517 vdekje janë regjistruar nga Qendra për Parandalimin dhe Kontrollin e Sëmundjeve në Afrikë.
Mpox (dikur e njohur si lia e majmunit) është një sëmundje virale që zakonisht transmetohet nga kafshët te njerëzit. Kjo sëmundje shkaktohet nga virusi i lisë së majmunit (MPXV), i cili gjendet te disa kafshë të egra, si brejtësit dhe qentë e egër, në disa rajone të Afrikës Qendrore dhe Perëndimore.
Sëmundja u identifikua për herë të parë nga shkencëtarët në vitin 1958, kur shpërthyen dy sëmundje të ngjashme me linë, te majmunët që përdoreshin për kërkime shkencore.
Si rrjedhojë, sëmundja mori emrin "lia e majmunit".
Megjithatë, majmunët nuk janë burimi kryesor i virusit; në fakt, brejtësit janë ata që përbëjnë kontigjentin kryesor të transmetuesve të këtij virusi.
Simptomat e Mpox zakonisht shfaqen 6-13 ditë (deri në 21 ditë) pas infektimit, me simptoma të përgjithshme si ethe, dhimbje koke, të dridhura, dobësi fizike, ënjtje të nyjeve limfatike, skuqje ose dhimbje shpine dhe dhimbje muskujsh.
Shumica e njerëzve përjetojnë simptoma të lehta apo mesatare që zgjasin zakonisht dy deri në katër javë, si dhe shërohen plotësisht.
Kjo epidemi Mpox transmetohet te njerëzit nga kontakti i ngushtë me kafshë ose njerëz të infektuar, ose duke prekur materiale të kontaminuara me viruse.
Ashpërsia e sëmundjes mund të ndryshojë në varësi të disa faktorëve, duke përfshirë mënyrën se si bartet virusi, sa i ndjeshëm është personi ndaj virusit.
