Ministri i Brendshëm i Kosovës ka akuzuar Serbinë se ka kidnapuar 3 zyrtarë policorë brenda territorit të Republikës së Kosovës.
“Përderisa rendi dhe ligji po zbatohet në vendin tonë, Serbia kriminale ka hyrë në territorin e Kosovës dhe ka kidnapuar 3 zyrtarë policorë të Republikës së Kosovës, në shkelje të çdo marrëveshje e kundër çdo parimi të normave ndërkombëtare”, publikoi Sveçla.
Mediat në Beograd kanë publikuar fotografi nga arrestimi i zyrtarëve policorë, por thonë se ata “janë kapur brenda territorit serb”. Këtë e përgënjeshtron ministri Sveçla.
“Pa asnjë dyshim, zyrtarët tanë policorë kanë qenë të vendosur thellë brenda territorit të Republikës së Kosovës, në pikë kontroll statik, duke kryer detyrat e tyre të rregullta”, thotë Sveçla.
Ministri i Brendshëm i Kosovës ftoi faktorin ndërkombëtar të rrisë urgjentisht presionin ndaj Serbisë që t’i lirojë policët kosovarë dhe të ndalë provokimet e saj.
