Më shumë se një vit Izraeli ka vazhduar sulmet e tij gjenocidale në Gaza dhe gjithashtu ka pushtuar Bregun Perëndimor. Opinioni mbarëkombëtar është dëshmitarë për gjithë brutalitetin dhe mizoritë izraelite duke mos kursyer as gratë, fëmijët e pleqtë.
Dhe në momente të tilla kur mendojmë se nuk mund të jetë më keq se kjo, vjen rrëfimi i trishtë i babait të foshnjës 11-muajshe që ishte paralizuar si pasojë e plumbave në kokë.
“Jahja është një fëmijë 11-muajsh, e pata pas tetë vitesh martesë.
Mjekët e morën atë nga unë për të bërë punën e tyre. Pasi morën rreze X, ata zbuluan se një plumb i kishte hyrë në pjesën e përparme të kokës dhe ishte futur në kafkë. Ata bënë një operacion që zgjati 3 orë. Ata kanë arritur ta heqin plumbin, por plumbi i ka shkaktuar problem në dorën e majtë, siç mund ta shihni, nuk lëviz”, deklaroi babai i foshnjës.
Ky ishte vetëm një ndër rastet e shumta që dëshmojnë horrorin e forcave izraelite ndaj palestinezëve në Gaza.
Por, së fundmi janë rrëfimet e mjekëve amerikanë të cilët kanë zbuluar një trend shqetësues gjatë punës së tyre në Gaza. “Kam parë dhunë dhe kam punuar në zona konflikti. Por, nga shumë gjëra që më kanë mbetur në mendje gjatë punës në spitalin e Gazës, njëra më goditi veçanërisht: pothuajse çdo ditë gjatë kohës që isha atje, shihja një fëmijë të vogël të ri që ishte qëlluar në kokë ose gjoks, e pothuajse të gjithë vdisnin. Gjithsej trembëdhjetë”, ka deklaruar Feroze Sidhwa.
Nuk ishte aspak më e lehtë deklarata e mjekes amerikane Mimi Syed e cila thotë: Kam pasur shumë pacientë, kryesisht nën moshën 12 vjeç, të cilët janë qëlluar në kokë ose në anën e majtë të gjoksit. Pacientët erdhën ose të vdekur ose në gjendje kritike dhe vdiqën menjëherë pas mbërritjes”.
Fëmijët me plagë plumbash në kokë ishin një dukuri e përditshme e përjetimeve të mjekëve amerikanë gjatë qëndrimit në Gaza.
Ndërsa kujtojmë se nga gjithsej 42 mijë të vrarë nga forcat izraelite në Gaza, të paktën 17 mijë prej tyre janë fëmijë, por kjo ende nuk është e mjaftueshme për të ndaluar këtë gjenocid izraelit mbi palestinezët?
