Bazuar në të dhënat e Administratës Tatimore, për shkak të bojkotit të dyqaneve të shtunën (8 shkurt), pesë rrjetet më të mëdha të shitjes me pakicë në Mal të Zi shënuan një rënie prej 30,23 për qind të qarkullimit krahasuar me datën 1 shkurt.
Siç raporton agjencia malazeze MINA, tregjet kanë realizuar 2,96 milionë euro xhiro më 8 shkurt, ndërsa qarkullimi më 1 shkurt, kur nuk ka pasur bojkot, ka qenë 4,24 milionë euro.
Të dhënat e Administratës Tatimore tregojnë se qarkullimi ka rënë më së shumti në rajonin qendror të vendit, me 35,86 për qind.
Qarku verior ka shënuar rënie të xhiros me 30,62 për qind, ndërsa në rajonin jugor ka 21,5 për qind më pak para në kasat e supermarketeve.
Numri i faturave të lëshuara ishte 18,15 për qind më i ulët.
Në vendet e rajonit të Ballkanit, përfshirë Malin e Zi, javët e fundit janë organizuar bojkotime të produkteve për shkak të çmimeve të larta.
