Kryeministri i Kosovës, Albin Kurti, në margjinat e Konferencës Ndërkombëtare Humanitare për Gazën në Paris është takuar me kryesuesin e Presidencës së Bosnjës dhe Hercegovinës Zheljko Komshiq dhe anëtarin e Presidencës Denis Beqiroviq.
Kurti falënderoi kryetarin e Presidencës së BeH-së Komshiq dhe anëtarin e Presidencës Beqiroviq për takimin produktiv.
“Diskutuam rëndësinë e zbatimit të plotë të marrëveshjes së Procesit të Berlinit, veçanërisht lëvizjen e lirë me karta identiteti dhe hulumtuam bashkëpunimin e mëtejshëm”, publikoi Kurti në rrjetin social X.
Kurti në fillim të tetorit deklaroi se ishte për të ardhur keq që Bosnjë e Hercegovina nuk e ratifikoi marrëveshjen për lëvizjen vetëm me letërnjoftime, të arritur një vit më parë në Berlin mes vendeve të Ballkanit Perëndimor.
Ai më pas deklaroi se nga janari i vitit 2024, qytetarët e Kosovës do të mund të lëvizin lirshëm në vendet e Bashkimit Evropian, por ende nuk është e sigurt se kur do të mund të udhëtojnë pa viza në Bosnjë e Hercegovinë.
Përveç Serbisë, Bosnjë e Hercegovina është i vetmi vend në rajon që nuk e njeh pavarësinë e Kosovës dhe i vetmi vend në rajon që ka regjim të vizave me Kosovën.
