Kuvendi i Kosovës po mban debat lidhur me cilësinë e ushqimit të pjesëtarëve të Forcës së Sigurisë së Kosovës (FSK), e thirrur nga deputetë të partive opozitare
Në këtë seancë nuk po marrin pjesë deputetët e shumicës parlamentare, të cilët në një konferencë për media para seancës, thanë se raportimet e opozitës për këtë çështje janë dezinformata dhe se ushtria e Kosovës nuk është dhe nuk do të mbetet pa ushqimin adekuat.
Deputeti i partisë më të madhe opozitare, Partisë Demokratike të Kosovës (PDK), Hisen Berisha, tha se është e papranueshme që institucioni kyç për sigurinë kombëtare të përballet me probleme elementare.
Berisha theksoi se pushteti po e saboton qëllimisht FSK-në, gjë e cila, sipas tij, duhet të ndalet.
"Është e papranueshme që institucioni kyç i sigurisë kombëtare të përballet me një menaxhim të tillë të dobët, sidomos kur këto çështje janë procedura të njohura prej kohësh", theksoi Berisha.
"Nuk është normale të diskutohet tani për logjistikën e ushtrisë"
Deputeti i Lidhjes Demokratike të Kosovës (LDK), Anton Quni, ka vlerësuar se Ministria e Mbrojtjes duhet të sigurojë që proceset e prokurimit për Forcën e Sigurisë së Kosovës duhet të jenë në përputhje me parimet dhe standardeve më të larta të transparencës dhe konkurrencës së drejtë dhe standardeve të NATO-s.
"Prandaj, nga përvojat e vendeve anëtare të NATO-s, ku Kosova aspiron anëtarësimin, është absolutisht e papranueshme që një procedurë kaq e rëndësishme si ajo për ushqimin e ushtrisë tonë, të shpërfaqë shkelje elementare", theksoi Quni.
Kryetari i Aleancës për Ardhmërinë e Kosovës (AAK), Ramush Haradinaj, tha se gjashtë vjet pasi është bërë ushtria e Kosovës, nuk është normale të diskutohet tani për logjistikën e ushtrisë.
"Nëse para gjashtë vjetësh kemi mbërritur të krenohemi në këtë parlament se po e krijojmë ushtrinë tonë, se po i votojmë ligjet për ushtrinë tonë, të cilat nuk dallojnë nga ushtritë e botës, se po e nisim rrugën tonë drejtë NATO-s, të vijmë sot këtu të diskutojmë se na ka lënë pa bukë ushtarët Albin Kurti", theksoi Haradinaj.
Shqetësim mbi ushqimin e ushtarëve të FSK-së
Javëve të fundit është ngritur shqetësim mbi ushqimin që hanë ushtarët e FSK-së, ku në media dhe rrjete sociale janë publikuar disa fotografi të shujtave me gjykime negative mbi to.
Ministri i Mbrojtjes, Ejup Maqedonci, ka deklaruar se janë bërë përpjekje për të siguruar furnizimet, me qëllim që shërbimi ushqimor për personelin e FSK-së të ofrohet në mënyrën më të mirë të mundshme.
Ndërkohë, presidentja Vjosa Osmani ka kërkuar një raport të detajuar nga Komandanti i FSK-së në lidhje me situatën e krijuar ditëve të fundit sa i përket furnizimit me ushqim për pjesëtarët e FSK-së.
