Parlamenti Evropian miratoi dje pa kundërshtime vendimin për heqjen e vizave për shtetasit e Kosovës, ndërsa akti ligjor firmoset sot. Vendimi hyn në fuqi pas publikimit në Gazetën Zyrtare dhe jo më larg se më 1 janar 2024.
Kështu, Kosova më në fund arriti në fund të rrugës së gjatë të liberalizimit të vizave, të cilën e filloi në vitin 2012. Çështja e liberalizimit u përdor nga BE-ja për të inkurajuar qeveritë e Kosovës që të çojnë përpara disa procese politike, siç janë demarkacioni i kufirit me Malin e Zi, dialogu me Serbinë dhe lufta kundër korrupsionit. Megjithatë, edhe kur Kosova bënte detyrat e shtëpisë, mungonte “shpërblimi” nga Brukseli.
TRT Balkan ju sjell disa momente kyç nga ky rrugëtim i Kosovës.
19 shkurt 2012 – Fillimi i dialogut për liberalizimin e vizave
Komisioni Evropian ka nisur procesin e liberalizimit të vizave për Kosovën. Në të njëjtën ditë, Komisari i BE-së Malmström zhvilloi takime dypalëshe me liderët e Kosovës në Prishtinë, duke përfshirë për të nisur dialogun për liberalizimin.
14 qershor 2012 – KE-ja i dorëzon Kosovës Udhërrëfyesin për vizat
Kosova pranoi udhërrëfyesin për liberalizimin e vizave, duke identifikuar të gjitha masat që Kosova duhet të miratojë dhe zbatojë për të avancuar drejt liberalizimit të vizave. Udhërrëfyesi përbëhej nga 95 standarde që duhej të plotësoheshin në mënyrë që të hiqen kërkesat për viza për qytetarët e Kosovës.
4 maj 2016 – Raporti përfundimtar për vizat
Komisioni Evropian i propozoi Këshillit Evropian dhe Parlamentit të BE-së të heqë vizat për shtetasit e Kosovës, pasi të përmbushen dy kushte – ratifikimi i marrëveshjes së demarkacionit me Malin e Zi dhe luftimi i korrupsionit.
21 mars 2018 – Kosova ratifikon marrëveshjen e demarkacionit me Malin e Zi
Kosova më në fund ratifikon marrëveshjen e vonuar për kufirin me Malin e Zi, pas dy vitesh gaz lotsjellës të hedhur nga opozita e atëhershme në Parlament dhe protestave masive.
18 korrik 2018 – Komisioni Evropian propozoi liberalizimin e vizave
Komisioni Evropian tha rekomandim pozitiv për liberalizimin e vizave për shtetasit e Kosovës, duke rikonfirmuar se Kosova ka plotësuar dy kriteret e jashtëzakonshme – demarkacionin dhe luftën kundër korrupsionit.
13 shtator 2018 – Parlamenti Evropian miraton hapjen e bisedimeve për vizat me Kosovën
Parlamenti Evropian është pajtuar që të hapë bisedimet për heqjen e regjimit të vizave për qytetarët e Kosovës. Miratimi erdhi pasi 420 nga anëtarët e PE-së votuan pro propozimit dhe 186 kundër tij.
14 tetor 2022 – Franca propozon që liberalizimi i vizave të lidhet me ETIAS-in
Në një takim të Grupit Punues në Bruksel, Franca ka propozuar që procesi i liberalizimit të vizave për Kosovën të lidhet me funksionalizimin e Sistemit Evropian të Informacionit dhe të Autorizimit të Udhëtimit (ETIAS). Propozimi është bërë nga Franca dhe është mbështetur nga Belgjika, Holanda, Spanja dhe Suedia.
30 nëntor 2022 – Caktohet si datë finale 1 janari 2024
Ministrat e Punëve të Jashtme të shteteve anëtare të BE-së kanë rënë dakord rreth një propozimi për t'u lejuar qytetarëve të Kosovës hyrjen pa viza në Zonën Schengen nga 1 nëntori 2023 ose më së voni nga 1 janar 2024.
