Liderët politikë në Kosovë përçuan mesazhe për zgjedhje korrekte dhe demokratike dhe i ftuan qytetarët për pjesëmarrje sa më të madhe përderisa shfrytëzuan të drejtën e votës.
Kryeministri aktual i Kosovës, Albin Kurti, i cili është kandidat për kryeministër edhe për një mandat me Lëvizjen Vetëvendosje, ka shfrytëzuar të drejtën e votës për zgjedhjet parlamentare të rregullta.
Kurti, i shoqëruar nga bashkëshortja e tij, ka votuar në Fakultetin Ekonomik të Universitetit të Prishtinës.
Pas votimit, Kurti falënderoi gjithë qytetarët që shfrytëzuan të drejtën e tyre për të votuar, derisa u bëri thirrje të gjithë qytetarëve me të drejtë vote të dalin në votime.
“Inkurajoj çdonjërin që të votojë. Ushtrojeni të drejtën demokratike për ta bërë zërin tuaj të dëgjohet. Përdoreni shansin e lirisë për të vendosur për katër vjetët e ardhshme. Gëzuar dhe suksese”, theksoi Kurti.
Kryeministri Kurti të njëjtin mesazh e përçoi edhe në gjuhën angleze dhe boshnjake.
Presidentja Osmani: Kosova ka demokracinë më të zhvilluar në rajon
Presidentja e Kosovës, Vjosa Osmani, ka ushtruar të drejtën qytetare për të votuar në procesin e zgjedhjeve të rregullta parlamentare në Kosovë në qendrën e votimit në Fakultetin Teknik të Universitetit të Prishtinës, e shoqëruar nga bashkëshorti i saj.
Ajo priti në radhë pas qytetarëve të tjerë, deri kur i erdhi koha e futjes në sallën e votimit.
Pas votimit, presidentja Osmani tha se sot është ditë vendimtare që të gjithë qytetarët e Kosvoës të japin kontribut në demokracinë e Kosovës.
Ajo tha se nga ky proces determinohet parlamenti i ardhshëm dhe institucione të tjera, por edhe merren vendime të cilat kanë rëndësi për kualitetin e qytetarëve.
“Shpresoj që e mbara t’i prijë Kosovës, vendit tonë të dashur, dhe një nga mënyrat më të mira për të kontribuuar për Kosovën tonë, është pikërisht duke shfrytëzuar të drejtën në votë”, theksoi Osmani.
Osmani i uroi suksese të gjithë atyre që kandiduan në këto zgjedhje, derisa shtoi se Kosova ka demokracinë më të zhvilluar në rajon dhe kjo duhet të ruhet.
Mesazhi i liderëve opozitarë
Krerët e partive politike opozitare në Kosovë shfrytëzuan të drejtën e votës në zgjedhjet parlamentare.
Kreu i partisë më të madhe opozitare në vend, Partisë Demokratike të Kosovës (PDK), Memli Krasniqi, votoi në Prishtinë me bashkëshorten e tij, derisa tha se dita e zgjedhjeve është ditë e madhe për vendin dhe demokracinë.
“Besoj se çdo qytetar duhet ta shfrytëzojë këtë të drejtë dhe të vendosë për drejtimin e vendit në katër vitet e ardhshme. Ashtu siç zhvilluam një fushatë pozitive, të fokusuar tek e ardhmja, jam i bindur se edhe vota e qytetarëve do të reflektojë të njëjtin vizion”, theksoi Krasniqi.
Edhe kandidati i kësaj partie, Bedri Hamza, i cili vjen nga qyteti i Mitrovicës dhe njëherësh është kryetar i Komunës së Mitrovicës, e shfrytëzoi të drejtën e votës në qytetin e tij, duke votuar bashkë me familjen.
“I inkurajoj të gjithë që ta bëjnë të njëjtën gjë. Unë votova për të siguruar që vlerat, vizioni dhe prioritetet tona ta formësojnë të ardhmen e shtetit tonë”, shkroi Hamza.
Kreu i partisë së dytë më të madhe në vend, Lidhjes Demokratike të Kosovës (LDK), Lumir Abdixhiku, i cili votoi në shkollën fillore “Faik Konica” në Prishtinë, tha se zgjedhjet janë festë e demokracisë.
“Në këtë ditë të bukur dimri, le të ushtrojmë demokracinë si vlerë, si besim, si fundament të Republikës tonë të re. Zoti e bekoftë Kosovën. Zoti e bekoftë popullin tonë”, theksoi Abdixhiku.
Gjithashtu edhe kandidati për kryeministër i koalicionit Aleanca për Ardhmërinë e Kosovës (AAK) dhe Nisma, Ramush Haradinaj, votoi në Prishtinë me familjen e tij.
Ai tha se dy fëmijët e tij, Gjini dhe Hana, votojnë për herë të parë në këto zgjedhje, ndërsa nëna e tij voton në vendlindjen e tij, në Gllogjan të Komunës së Deçanit.
“Votoni edhe ju. Kosova ka nevojë për votën tuaj sot. Mos e humbni – votoni”, shkroi Haradinaj.
