Afati për konvertimin e patentave të shoferëve të lëshuara ilegalisht nga Serbia në patentat legale "RKS" për Kosovën ka skaduar.
Sipas të dhënave të Policisë së Kosovës, deri më 23 gusht, në orën 16:00, janë konvertuar 6.509 patenta në "RKS".
Në qytetet me shumicë serbe, Komuna e Leposaviqit kryeson me mbi 2 mijë konvertime të patentave të shoferëve ilegalë në "RKS", ndërsa numri i konvertimeve ishte më i ulët në Mitrovicën e Veriut dhe Zveçan.
Vetëm në afatin e fundit, u konvertuan 184 patenta.
Policia ka njoftuar se këtë fundjavë zyrtarët policorë do të paralajmërojnë shoferët që ende nuk kanë legalizuar patentat e tyre të shoferit. Ndërkaq, duke filluar nga 26 gushti, do të fillojë zbatimi i gjobave nga 500 deri në 1.500 euro për ata që përdorin patenta të lëshuara nga Serbia për qytetet e Kosovës.
Që nga 9 maji i këtij viti, Ministria e Punëve të Brendshme e Kosovës lejoi konvertimin e patentave të shoferëve ilegalë në patentat "RKS" me disa lehtësira, duke hequr kërkesën për dhënien e provimit të patentës për shofer.
Procesi ishte paraparë të përfundonte më 9 gusht, por u shty për shkak “të kërkesave të shumta të qytetarëve”.
