Presidentja e Kosovës Vjosa Osmani, i bëri thirrje Spanjës të marrë masa ndaj Serbisë dhe tha se nuk ka arsye të bisedohet me presidentin serb Aleksandar Vuçiq derisa të miratohen sanksionet.
“Nuk ka arsye për takim derisa të miratohen sanksionet ndaj Vuçiqit. Fillimisht sanksionet, e pastaj të diskutojmë për pjesën tjetër”, tha Osmani në Granada pas mbërritjes në samitin e Komunitetit Politik Evropian.
Ngjarjet e 24 shtatorit në Banjskë presidentja Osmani i cilësi si “akt të tmerrshëm”. .
“Shpresoj se Spanja do t'u bashkohet vendeve të tjera me të njëjtin mendim në Evropë për të marrë masa kundër Serbisë për këtë akt të tmerrshëm, jo vetëm kundër Kosovës, por kundër paqes dhe stabilitetit dhe sigurisë së gjithë kontinentit evropian”, tha ajo.
Osmani shtoi se shpreson të ketë mundësinë të diskutojë këtë me liderin spanjoll, por pranoi se nuk kanë një takim të konfirmuar.
