Një person është lënduar si pasojë e zjarrit që ka shpërthyer në një pikë shitjeje të mjeteve piroteknike në Prizren.
Personi i lënduar është dërguar në Qendrën Klinike Universitare të Kosovës.
Rasti ka ndodhur në rrugën “Ahmet Prishtina” dhe Policia e Kosovës e ka pranuar informatën rreth orës 21:33.
“Gjendja e tij është me lëndime të rënda sipas informatës është dërguar për në QKUK- Prishtinë”, tha për KosovaPress zëdhënësi i Policisë për rajonin e Prizrenit, Vesel Gashi.
Ai tha se zjarri është përhapur edhe në lokalet dhe ndërtesat rreth pikës së shitjes.
“Si dhe dëme materiale të shumta ne objekte dhe automjete të parkuara në atë pjesë, janë informuar njësitet patrulluese te cilat kanë dalë në vendin e ngjarjes dhe i kanë ndërmarrë veprimet ligjore ne lidhje me këtë rast.
“Po ashtu, në vendngjarje kanë dalë edhe njësiti i zjarrfikësve të cilët kane arritur ta shuajnë zjarrin si dhe Inspektori i tregut i cili po ashtu është ne vend ngjarje, edhe teknika kriminalistike ka dalë në vendngjarje me hetuesin kujdestar”, tha ai.
“Duhet cekur se për momentin situata është nën kontrollin policor dhe janë duke vazhduar me trajtimin e këtij rasti”, shtoi ai.
Mbi 20 të lënduar nga mjetet piroteknike
Mbi 20 raste janë trajtuar në Klinikën Emergjente si shkak i lëndimeve të shkaktuara nga mjetet piroteknike.
Shefi i Emergjencës, Agron Çitaku, bën të ditur se këto raste janë të moshës mesatare, ndërkaq dy prej tyre janë të moshës së shtyrë.
"Për momentin deri më tani kemi 24 të lajmëruar, si pasojë e lëndimeve të shkaktuara nga mjetet piroteknike. Prej tyre një ka qenë në gjendje më të rëndë që ka ardhur nga Prizreni, është duke u punuar në sallë ende, tre i kemi me lëndime në regjionin e syrit, ndërsa të tjerët janë kryesisht janë në ekstremitete", deklaroi ai.
