Organizata terroriste FETO nuk është një problem serioz vetëm për sigurinë kombëtare të Türkiyes, por edhe të Maqedonisë së Veriut, tha kryetari i Kuvendit të Madh Popullor të Türkiyes (TBMM), Mustafa Şentop, gjatë takimit me homologun e tij nga Maqedonia e Veriut, Talat Xhaferi.
Siç njoftojnë nga TBMM-ja, Şentop në këtë takim ka përcjellë pritshmëritë e Türkiyes që strukturat e lidhura me FETO-n të mbyllen dhe personat e lidhur me organizatën të deportohen nga Maqedonia e Veriut.
Şentop theksoi se Republika e Türkiyes mbështet fuqishëm integrimin euroatlantik të vendeve të Ballkanit dhe veçanërisht të Republikës së Maqedonisë së Veriut. Në këtë drejtim, ai uroi për fillimin e negociatave të Shkupit për anëtarësim në BE dhe u shpreh i bindur se vendi do të bëhet anëtar i BE-së brenda një periudhe të arsyeshme kohore.
Kryeparlamentari i Maqedonisë së Veriut, Talat Xhaferi, me këtë theksoi se me Republikën e Türkiyes ruajnë miqësi dhe partneritet të fortë tradicional, ndërsa bashkëpunimi dypalësh midis të dyja vendeve është dinamik në të gjitha nivelet dhe veçanërisht në nivelin parlamentar.
Sipas njoftimit të lëshuar nga Kuvendi, Xhaferi u shpreh i kënaqur për vizitën e sërishme të kryeparlamentarit Şentop, e cila përkon me shënimin e 21 Dhjetorit, Ditës së Mësimit në Gjuhën Turke.
