Vuçiq: Vendimi për targat mund të zbatohet vetëm me forcë

Në Bruksel shkon që të tentojë të ruajë paqen dhe stabilitetin, kështu është shprehur presidenti i Serbisë, Aleksandar Vuçiq, në vigjilje të takimit me kryeministrin e Kosovës Albin Kurti.
"Ne nuk kërcënojmë askënd, vetëm dëshirojmë të sigurojmë respektimin e rregullave ndërkombëtare, normat e së drejtës publike ndërkombëtare nga Rezoluta 1244 e Këshillit të Sigurimit të Kombeve të Bashkuara deri te Marrëveshja e Brukselit. Këto janë marrëveshje që janë në fuqi dhe ato duhet të respektohen dhe zbatohen", u tha Vuçiq gazetarëve pas vizitës së pajisjeve ushtarake që prodhon industria përkatëse në Serbi.
Siç tha ai, nuk e di se çfarë të presë në takim, se Beogradi është i interesuar të diskutojë gjithçka, por dëshiron të diskutojë për Asociacionin e Komunave Serbe (AKS), por jo që dikush të thotë se AKS duhet të jetë në përputhje me Kushtetutën e Kosovës.
“Kuptohej që këto autorizime do të ishin shumë më të mëdha dhe më të gjera, prandaj ne negociuam, është e qartë se çfarë u negociua”, tha Vuçiq në prezantimin e akademisë ushtarake.
I pyetur për situatën me targat, Vuçiq tha se situata është e qartë për Beogradin dhe se “nëse dikush dëshiron ta zbatojë me dhunë, mund të bëjë çdo gjë me dhunë, pyetja e vetme është se deri kur”.
Ai porositi Prishtinën të mos presin që Serbia të ndihmojë në këtë çështje.
Siç theksoi, para takimit me Kurtin do të ketë takime me sekretarin e përgjithshëm të NATO-s, Jens Stoltenberg, dhe përfaqësuesin special të administratës amerikane për Ballkanin Perëndimor, Gabriel Escobar.
Po ashtu presidenti i Serbisë Aleksandar Vuçiq ka deklaruar sot se Qeveria e Kosovës mund të zbatojë vendimin e saj për targat e automjeteve, kryesisht në veri "vetëm me dhunë", është shprehur sot presidenti i Serbisë, Aleksandar Vuçiq.

Duke komentuar masën e reciprocitetit ndaj targave dhe letërnjoftimeve të lëshuara nga Serbia e cila është shtyrë për 1 shtator nga Qeveria e Kosovës, presidenti Vuçiq tha se “kjo mund të bëhet vetëm me dhunë”.

“Kur bëhet fjalë për targa është një situatë e qartë, ata (Kosova) mund t'i zbatojnë me forcë, por mos prisni që Serbia t'iu ndihmojë në procesin ligjor rregullimin e problemit”, tha Vuçiq.

I pyetur nëse Beogradi do ta vendosë në rend dite më 18 gusht në Bruksel temën e targave para 1 shtatorit, Vuçiq tha se do të shkojë në Bruksel për të provuar të ruajnë paqen, teksa ka shtuar se “nuk e kanë problem për temat për të cilat pritet të diskutohen”.

“Ne jemi të interesuar të diskutojmë gjithçka. Ne nuk kemi problem me temat. Ne duam të flasim për asociacionin e komunave serbe. Nëse thonë se nuk është në përputhje me Kushtetutën (e Kosovës), atëherë nuk na duhet një e tillë në përputhje me kushtetutën. Pse duhet të na interesojë Kushtetuta e tyre”, tha ai.

Shërbimi Evropian i Veprimit të Jashtëm (EEAS) theksoi dje se të gjitha çështjet e hapura ndërmjet Beogradit dhe Prishtinës do të zgjidhen përmes dialogut për normalizimin e marrëdhënieve ndërmjet Kosovës dhe Serbisë me ndërmjetësimin e BE-së.

Vuçiq më 18 gusht në Bruksel do të takohet me kryeministrin e Kosovës Albin Kurti në kuadër të dialogut me ndërmjetësimin e BE-së. Takimi mbahet më pak se dy javë para 1 shtatorit kur Prishtina zyrtare ka paralajmëruar vendosjen e reciprocitetit ndaj targave dhe letërnjoftimeve të lëshuara nga Serbia.