Vuçiq vlerëson presidentin turk: Türkiye ka përparuar me Erdoğanin

Në kuadër të turneut të tij rajonal, pas vizitës në Bosnje Hercegovinë, Erdoğan ka qëndruar sot në Beograd, kryeqytetin e Serbisë, ku është takuar me homologun e tij serb, Aleksandar Vuçiq.

Gjatë konferencës për media, presidenti serb nuk ka kursyer fjalët dhe ka vlerësuar kolegun e tij turk Erdoğan.
“Dua të falënderoj (Erdoğan) që ka pasur gjithmonë kohë për të shqyrtuar situatën në rajon, pavarësisht nga dallimet tona në lidhje me Kosovën apo Prishtinën. Ishte gjithmonë presidenti Erdoğan ai që këmbënguli për paqen, stabilitetin, për gjetjen e zgjidhjeve diplomatike. “, tha Vuçiq.

Ai falënderoi Erdoğanin, siç tha, për korrektësinë e tij dhe gjithçka që tregon ndaj Serbisë.

"Një njeri që gjithmonë është kujdesur dhe ka treguar respekt për vendin tonë të vogël, si në aspektin territorial ashtu edhe në aspektin e popullsisë. Ne jemi të detyruar të tregojmë respekt të madh ndaj Türkiye-s dhe të përgjigjemi gjithmonë në të njëjtën mënyrë", shtoi Vuçiq.

Ai u bëri thirrje të gjithë turqve që të vijnë sa më shpesh në Serbi, të ndihen si në shtëpinë e tyre në Serbi dhe të përpiqen të jenë mikpritës të mirë.

“Ftoj gjithashtu njerëzit tanë të shkojnë jo vetëm në Istanbul, por edhe në Ankara dhe në të gjitha vendet e tjera, ku mund të shohin se sa shumë ka përparuar ky vend i madh nën udhëheqjen e presidentit Erdoğan dhe sa më shumë mund të mësojmë prej tyre”, tha Vuçiq.