“Bertoni GDE” ka selinë në një ndërtesë të vogël që ndodhet në zonën industriale të Paderno Dugnano, një qytet i vogël në periferi të Milanos në Italinë veriore.
Zyrat janë në dy kate me punishte dhe dhjetë punonjës. Kompania është një nga dhjetëra mijëra ndërmarrjet e vogla ose të mesme që përbëjnë shtyllën kurrizore të ekonomisë italiane dhe kontribuojnë që ajo të jetë një nga më të prosperuarat.
Por, ajo që e bën të veçantë është se këtu është krijuar një nga objektet më të njohura në planet në pesëdhjetë vitet e fundit – Kupa e Botës së Futbollit.
Në fillim të viteve 1970, si rezultat i fitores së tretë të Brazilit për të ngritur Kupën Jules Rimet në Mexico City kundër Italisë, filloi historia e pamjes dhe formës së kupës më të famshme.
Sipas rregullores së FIFA-s në atë kohë, me tri fitore në vitet 1958, 1962 dhe 1970, brazilianët mund ta ngrinin trofeun pa e kthyer atë në selinë e Federatës Botërore të Futbollit në Cyrih, siç bën zakonisht kampioni.
Dizajn i ri
Në atë moment, FIFA kuptoi se ishte e nevojshme të hartohej dhe të prodhohej një kupë e re dhe për këtë arsye organizoi një garë ndërkombëtare në të cilën u paraqitën 53 propozime nga e gjithë bota.
Midis tyre, një nga propozimet është projektuar nga skulptori milanez Silvio Gazzaniga, drejtori artistik i Bertonit, i cili vlerësohet shumë edhe sot, gjashtë vjet pas vdekjes së tij.
“Ideja për këtë kupë erdhi nga ai dhe gjyshi im Eugenio Losa”, thotë Valentina Losa, drejtoreshë ekzekutive e Bertoni, një kompani e gjeneratës së katërt të drejtuar nga familja, e themeluar në fillim të shekullit të 20-të.
“Fillimisht, dizajni tregoi dy portierë që ngrinin krahët dhe mbanin një top futbolli mbi kokat e tyre. Pas diskutimeve të ndryshme, skica e skulpturës u ndryshua dhe dy portierët u zëvendësuan nga dy engjëj të fitores. Dhe në vend të topit u vizatua një glob”, thotë Losa.
Puna e Gazzaniga dhe Bertoni u zgjodh nga FIFA dhe kombëtarja e Gjermanisë Perëndimore ishte skuadra e parë që fitoi kupën e re në Kupën e Botës FIFA 1974.
Punonjësit e punishtes janë të ngarkuar me prodhimin e kupës. Fillimisht bëhet forma, më pas nivelohet dhe në fund lëmohet. Më pas kalon nëpër disa “duar” dhe lahet me sodë buke dhe zhytet në disa lëngje. Në fund i hidhet llak. Kupa është e lartë 38 centimetra dhe peshon 6.2 kilogramë.
Një kopje origjinale
“Ka vetëm një kopje origjinale të trofeut të mbajtur nga FIFA. Kampionëve u jepet kupa në një ceremoni për shpalljen e fituesve, pasi janë luajtur finalet e kampionatit. Është prej floriri 18 karatësh dhe FIFA pasi dihet fituesi na e jep për të gdhendur emrin e ekipit fitues”, shpjegon Losa.
“Fituesit sigurisht marrin një kopje të kupës, e cila nuk është prej ari, por prej bronzi të artë, ku është gdhendur emri i ekipit kampion”.
Kupa e Botës në Katar tashmë është duke u zhvilluar, dhe bashkë me trofeun është caktuar edhe shpërndarja e ekipit fitues në fund të muajit pasi finalja do të luhet më 18 dhjetor.
Në Bertoni, ku bëhen edhe kupat për Ligën e Evropës, Superkupën e Europës dhe trofeun popullor “veshëgjatë” për Champions League, tashmë po punohet për prodhimin e kupës së re për Botërorin FIFA 2026, i cili do të organizohet bashkërisht nga Kanadaja, ShBA-ja dhe Meksika.
“Sapo të përfundojë ky kampionat do të prezantojmë kupën e re”, thotë Losa.
