Pavarësisht ndalimit të pjesëmarrjes së Moskës në marrëveshjen e grurit të Detit të Zi, presidenti turk Recep Tayyip Erdoğan tha të hënën se ai beson se presidenti rus Vlladimir Putin dëshiron që marrëveshja të vazhdojë.
“Pavarësisht deklaratës së sotme, unë besoj se presidenti rus Putin dëshiron që kjo urë humanitare të vazhdojë”, tha Erdoğan në një konferencë për media në Istanbul përpara se të nisej për në Arabinë Saudite për një vizitë zyrtare.
Vërejtjet e Erdoğanit erdhën menjëherë pasi Kremlini njoftoi pezullimin e marrëveshjes së grurit, e cila skadon sot.
Marrëveshja e grurit të Detit të Zi hyri në histori si një sukses diplomatik, theksoi Erdoğan, duke shtuar se Türkiye i ka kushtuar gjithmonë rëndësi vazhdimit të nismës dhe ka intensifikuar përpjekjet diplomatike për këtë qëllim.
Erdoğan tha se ministri i jashtëm turk Hakan Fidan dhe homologu i tij rus Sergej Llavrov do të diskutojnë marrëveshjen nëpërmjet telefonit, duke shprehur optimizëm se ajo do të vazhdojë "pa ndërprerje".
“Përveç kësaj, ne mund të ndërmarrim hapa nëpërmjet një telefonate me Putinin pa pritur gushtin”, shtoi ai.
Më parë, Erdoğani tha se Putini pritet të vizitojë Türkiyen në gusht për të diskutuar marrëdhëniet dypalëshe dhe çështjet rajonale.
Një vit më parë, Türkiye, OKB-ja, Rusia dhe Ukraina nënshkruan një marrëveshje në Istanbul për të rifilluar eksportet e drithit nga tri porte ukrainase të Detit të Zi, të cilat ishin ndërprerë pas fillimit të luftës Rusi-Ukrainë në atë shkurt.
Një qendër e përbashkët koordinimi u krijua në Istanbul me zyrtarë nga të tria vendet dhe OKB-ja për të mbikëqyrur dërgesat.
