Türkiye po vazhdon intensivisht me përpjekjet për heqjen e mbeturinave në rajonin jugor të goditur nga tërmeti, deklaroi presidenti Recep Tayyip Erdoğan, mbrëmë nga Ankaraja, pas iftarit (darkës) me të prekurit nga tërmetet dhe ekipet e kërkim-shpëtimit.
“Ne po i vazhdojmë intensivisht përpjekjet tona për heqjen e mbeturinave. Ndërsa ndërtimi i rezidencave tona të përhershme vazhdon pa ndërprerje, ne kemi premtuar t’i përfundojmë ato brenda një viti”, tha Erdoğan.
Türkiye planifikon të ndërtojë ndërtesa të mjaftueshme brenda një viti për të përmbushur nevojat e viktimave të tërmetit. Erdoğan është zotuar më parë se 319.000 shtëpi do të ndërtohen në vitin e parë dhe 650.000 në total.
Më 6 shkurt, dy tërmete, me magnitudë 7,7 dhe 7,6 ballë, goditën 11 provinca në Türkiye.
Rreth 14 milionë njerëz në Türkiye janë prekur nga tërmetet, si dhe shumë të tjerë në Sirinë veriore.
Erdoğan tha gjithashtu se heqja e mbeturinave do të përfundojë në të gjitha provincat, përveç Hatayit, deri në fillimin e festës së Fitër Bajramit, më 21 prill.
“Ne do t’i dorëzojmë disa shtëpi fshatrash deri në Fitër Bajram”, shtoi ai.
