Türkiye ka neutralizuar 44 terroristë gjatë javës së kaluar, duke përfshirë edhe ata që fshihen përtej kufirit në veri të Irakut dhe Siri, tha Ministria e Mbrojtjes Kombëtare.
Që nga janari janë shënjestuar gjithsej 359 terroristë, 144 në Irakun verior dhe 215 në veri të Sirisë, tha Zeki Akturk, zëdhënësi i Ministrisë së Mbrojtjes Kombëtare, në një konferencë për medie në kryeqytetin Ankara.
Autoritetet turke përdorin termin "neutralizoj" për të nënkuptuar se terroristët në fjalë u dorëzuan, u vranë ose u kapën.
Në fushatën e saj terroriste më shumë se 35-vjeçare kundër Türkiyes, PKK-ja – e listuar si organizatë terroriste nga Türkiye, ShBA-ja dhe BE-ja – ka qenë përgjegjëse për vdekjen e mbi 40.000 njerëzve, duke përfshirë gra, fëmijë dhe foshnja. YPG-ja është dega e saj siriane.
Terroristët e PKK/YPG-së shpesh fshihen përtej kufirit të Türkiye në Irakun verior dhe Siri, ku planifikojnë sulme ndaj forcave turke ose popullatës lokale.
Siguria kufitare
Për më tepër, 207 persona u kapën në përpjekje për të kaluar ilegalisht kufijtë gjatë javës së kaluar, ndërsa 2.495 të tjerë u parandaluan të kalojnë.
Vendi, i cili tashmë pret katër milionë refugjatë, më shumë se çdo vend tjetër në botë, po merr masa të reja në kufijtë e tij për të parandaluar një fluks të ri emigrantësh.
Akturk nënvizoi misionet e suksesshme të Forcave të Armatosura Turke në rajone të ndryshme, duke përfshirë Republikën Turke të Qipros Veriore, Azerbajxhanin, Libinë, Kosovën, Bosnjë e Hercegovinën, Katarin, Somalinë dhe të tjera vende, duke shprehur mbështetjen e vazhdueshme për “kauzat e drejta të vëllazërimit, miqësisë dhe shtete aleate”.
Ai gjithashtu theksoi se Ministri i Mbrojtjes Kombëtare të Türkiyes, Yasar Guler, zhvilloi një vizitë zyrtare në Irak me shefin e shtabit të përgjithshëm gjeneral Metin Gurak, gjatë së cilës u zhvilluan diskutime mbi çështjet dypalëshe dhe rajonale të mbrojtjes dhe sigurisë, duke përfshirë përpjekjet kundër terrorizmit dhe sigurinë kufitare.
Akturk përsëriti thirrjen për një armëpushim urgjent dhe të përhershëm në luftën e Izraelit në Gaza, duke theksuar rëndësinë e garantimit të sigurisë dhe paqes për të gjithë në rajon dhe parandalimin e përshkallëzimit të konflikteve.
