Për 2 vite Türkiye shpëtoi jetën e 41 mijë emigrantëve të dëbuar nga Greqia

Presidenti i Türkiye-s, Recep Tayyip Erdoğan, ka bërë të ditur se vendi i tij ka shpëtuar jetën e emigrantëve të parregullt të cilët u kthyen prapa në mënyrë të paligjshme nga Greqia.

“Me përpjekjet e rojës sonë bregdetare ne kemi parandaluar vdekjet në Egje. Në dy vitet e fundit, ne kemi shpëtuar jetën e 41 mijë njerëzve të lënë të vdesin nga Greqia”, tha presidenti Erdoğan në një ceremoni diplomimi të Akademisë së Xhandarmërisë dhe Gardës Bregdetare në kryeqytetin Ankara.

Erdoğan tha se numri i emigrantëve të parregullt të kapur nga roja bregdetare turke ka arritur në 245 mijë dhe theksoi se xhandarmëria vazhdon luftën kundër emigrimit të parregullt dhe trafikantëve të qenieve njerëzore.

“Nëse dikush ende kritikon përparimet e industrisë sonë të mbrojtjes, pavarësisht nga ngritja ushtarake në Greqi, kjo do të thotë se ata janë privuar nga vizioni strategjik”, shtoi ai.

Türkiye ka qenë një pikë kyçe e tranzitit për azilkërkuesit që synojnë të kalojnë në Evropë për të filluar jetë të re, veçanërisht ata që ikin nga lufta dhe persekutimi.

Ankara dhe grupet globale të të drejtave në mënyrë të përsëritur kanë dënuar praktikën e paligjshme të Greqisë, duke theksuar se ajo shkel vlerat humanitare dhe ligjin ndërkombëtar duke rrezikuar jetën e emigrantëve të cenueshëm, përfshirë gra dhe fëmijë.