Presidenti turk Recep Tayyip Erdoğan mbështeti fuqishëm vërejtjet e fundit të Sekretarit të Përgjithshëm të Kombeve të Bashkuara Antonio Guterres për reformën e Këshillit të Sigurimit të OKB-së, duke theksuar nevojën për një sistem më të drejtë global që përfshin përfaqësimin afrikan.
Duke iu drejtuar postimit të Guterres në rrjetin social X, Erdoğan tha:
"Struktura e Këshillit të Sigurimit të OKB-së, e cila është larg përmbushjes së detyrës për të garantuar paqen dhe sigurinë globale, duhet të ndryshohet rrënjësisht."
Komentet e Erdoğanit erdhën pas deklaratës së Guterres i cili tha: "Këshilli i Sigurimit u krijua nga fitimtarët në Luftën e Dytë Botërore. Bota ka ndryshuar. Bota ka ndryshuar, por përbërja e Këshillit nuk ka mbajtur ritmin me ndryshimet."
“Të shprehim sinqerisht dhe me zë të lartë pikëpamjet tona për nevojën që Këshilli i Sigurimit i OKB-së t'i nënshtrohet reformave në përputhje me kushtet aktuale dhe në mënyrë të drejtë, është shumë e vlefshme që bota të ketë përsëri një sistem të drejtë”, tha Erdoğan.
Duke premtuar mbështetjen e vazhdueshme të Türkiyes për krijimin e një sistemi të drejtë ndërkombëtar, Erdoğan tha:
"Ne do të vazhdojmë të qëndrojmë me të gjithë miqtë që mbështesin një sistem ndërkombëtar të drejtë dhe një Këshill të Sigurimit të OKB-së që plotëson kushtet e sotme."
Presidenti turk iu referua veçanërisht mungesës së përfaqësimit afrikan në Këshillin e Sigurimit, duke thënë:
"Kontinentit afrikan dhe të gjithë vëllezërve tanë afrikanë duhet t'i jepet mundësia për të kontribuar në këtë sistem të drejtë. Në përgjigje të këtyre pritjeve, ne do të vazhdojmë të themi se bota është më e madhe se pesë dhe të veprojmë me mirëkuptimin se një botë më e drejtë është e mundur”, tha presidenti turk.
