Një falsifikues famëkeq i parave përgjegjës për prodhimin e kartëmonedhave false euro me vlerë rreth 11 milionë euro është arrestuar në Itali, sipas një deklarate të lëshuar të hënën nga agjencia e zbatimit të ligjit të Bashkimit Evropian, Europol.
Falsifikuesi, i arrestuar në Napoli përmes një operacioni të përbashkët të autoriteteve franceze dhe italiane, ishte i përfshirë në shpërndarjen e kartëmonedhave të falsifikuara në të gjithë Evropën me vlerë tetë milionë euro. Autoritetet zbuluan gjithashtu tre milionë euro shtesë në monedhë të falsifikuar, gati për qarkullim.
Në njoftimin e Europol thuhet se personi i arrestuar besohet të jetë përgjegjës për më shumë se 27 për qind të të gjitha kartëmonedhave euro të falsifikuara të zbuluara dhe hequra nga qarkullimi në vitin 2023.
Falsifikuesi përdorte kanale kombëtare dhe transnacionale të shpërndarjes, me një pjesë të konsiderueshme të monedhës së falsifikuar që qarkullonte në Francë. Kartëmonedhat e falsifikuara ishin kryesisht në 20, 50 dhe 100 euro.
Analizat e ekspertëve, përfshirë një vlerësim nga Banka Qendrore Evropiane, konfirmuan cilësinë e lartë të kartëmonedhave të falsifikuara, duke vënë në pah masat e sofistikuara, si hologramet të përdorura në prodhimin e tyre.
