Regjimi i rrëzuar i Bashar al-Assad-it në Siri transportoi rreth 250 milionë dollarë në para të gatshme në Moskë midis viteve 2018 dhe 2019, mes sanksioneve në rritje nga Perëndimi dhe varësisë së thelluar financiare ndaj Rusisë për mbështetje ushtarake dhe ekonomike, sipas dokumenteve të zbuluara nga Financial Times.
Dokumentet e siguruara nga gazeta britanike tregojnë se banka qendrore e Sirisë transportoi ngarkesa me dollarë amerikanë dhe euro, me peshë gati dy tonë, në Aeroportin Vnukovo të Moskës. Këto fonde u depozituan në banka ruse të sanksionuara nga ShBA-ja.
Transferimet ndodhën gjatë një periudhe kur Siria, duke vuajtur nga rezervat e pakësuara valutore, mbështetej shumë në ndihmën ushtarake të Rusisë, përfshirë mbështetjen nga Grupi Wagner.
"Regjimi duhet t'i çonte paratë jashtë vendit në një strehë të sigurt për t’i përdorur ato për një jetë luksoze... për regjimin dhe rrethin e tij të ngushtë," tha David Schenker, ish-ndihmëssekretari i Shtetit të ShBA-së për Çështjet e Lindjes së Afërt.
Paratë siriane u përdorën për qëllime të ndryshme, përfshirë pagesat për grurë, shpenzimet ushtarake dhe shërbimet e shtypjes së parasë në Rusi.
Një burim i njohur me transaksionet tha: "Kur një vend është plotësisht i rrethuar dhe i sanksionuar, ka vetëm para të gatshme."
Familja e Assadit kanalizon pasurinë në Rusi
Hetimi i Financial Times theksoi gjithashtu se si familja dhe bashkëpunëtorët e Assad-it transferuan pasuri në Rusi.
Që nga viti 2013, të afërmit e Assad-it kanë blerë të paktën 20 apartamente luksoze në Moskë duke përdorur marrëveshje financiare të ndërlikuara.
Eyad Hamid, një studiues i lartë në Programin Sirian për Zhvillim Ligjor, tha: "Rusia ka qenë një strehë për financat e regjimit të Assad-it për vite," duke nënvizuar rolin e saj si një qendër për shmangien e sanksioneve.
Zyrtarët amerikanë kanë akuzuar regjimin e Assad-it për korrupsion të gjerë dhe aktivitet kriminal për të financuar përpjekjet e tij luftarake.
Departamenti i Thesarit të ShBA-së ka sanksionuar disa entitete siriane dhe ruse të përfshira në lehtësimin e këtyre transferimeve të parasë.
Malik al-Abdeh, një analist sirian, vuri në dukje: "Shteti sirian mund të jetë duke paguar shtetin rus për ndërhyrjen ushtarake."
Këto zbulime hedhin dritë mbi mënyrën se si regjimi i Assad-it mbijetoi financiarisht gjatë luftës shkatërruese civile të Sirisë, ndërsa sanksionet perëndimore e shtynë më tej në orbitën e Moskës.
Assadi, i cili e qeverisi Sirinë me dorë të hekurt për gati 25 vjet, u largua për në Rusi më 8 dhjetor pasi grupet kundër regjimit morën kontrollin e Damaskut.
Marrja nën kontroll erdhi pasi luftëtarët e Hayat Tahrir al-Sham (HTS) kapën qytete kyçe në të gjithë vendin në një ofensivë rrufe që zgjati më pak se dy javë.
