Shefja e politikës së jashtme të BE-së, Kaja Kallas, njoftoi sot se lehtësimi i sanksioneve ndaj Sirisë është në agjendën e tyre.
“Ne do të shikojmë se si t'i lehtësojmë sanksionet. Por, kjo duhet ta ndjekë përparimin e prekshëm në një tranzicion politik që pasqyron Sirinë në gjithë diversitetin e saj”, tha Kallas në një takim për Sirinë të mbajtur në kryeqytetin saudit Riad.
Duke theksuar se shpresat dhe sfidat ekzistojnë në Siri, Kallas tha në X se do të diskutojë procesin e vazhdueshëm të tranzicionit në Siri me ministrat e jashtëm të vendeve të Gjirit, Lindjes së Mesme dhe Evropës.
Ajo shprehu gatishmërinë e BE-së për të ndihmuar në procesin e tranzicionit. “BE-ja është këtu për të ndihmuar në këtë tranzicion, ku ne kemi nevojë dhe mund të kemi më shumë përdorim”, shtoi ajo.
Ministrat e Jashtëm nga vendet arabe dhe perëndimore mbajtën një takim në Riad sot për ta diskutuar situatën në Siri pas rënies së regjimit të Bashar Asadit muajin e kaluar.
Asad, lideri i Sirisë për gati 25 vjet, u arratis në Rusi pasi grupet kundër regjimit morën kontrollin e Damaskut më 8 dhjetor, duke i dhënë fund regjimit dhjetëravjeçar të Partisë Baath.
Një administratë e re e udhëhequr nga Ahmed al-Sharaa ka marrë tani kontrollin e vendit.
