Ofensiva ushtarake izraelite në kampin e refugjatëve Tulkarem, në veri të Bregut Perëndimor të okupuar, ka detyruar 12.000 palestinezë të zhvendosen, deklaroi të martën një zyrtar lokal.
"Autoritetet e okupimit vazhdojnë ta mbajnë nën rrethim kampin Tulkarem dhe të dëbojnë banorët e tij nën kërcënimin e armëve," tha zëvendësguvernatori Faisal Salama.
Ai shtoi se forcat izraelite vazhdojnë të shkatërrojnë shtëpi, rrugë dhe të gjitha objektet në kamp.
Sipas tij, që nga muaji i kaluar, forcat izraelite kanë shkatërruar 40 ndërtesa me 100 njësi banimi në kamp.
"Ushtria izraelite ka djegur 10 shtëpi dhe ka shkatërruar gati 300 dyqane në kamp," shtoi Salama.
Ai theksoi se ofensiva izraelite në veri të Bregut Perëndimor ka qëllime politike dhe synon të ndryshojë strukturën demografike të kampit.
Ushtria izraelite po zhvillon operacione në veri të Bregut Perëndimor që nga 21 janari, gjatë të cilave janë vrarë mbi 61 palestinezë dhe mijëra të tjerë janë zhvendosur, sipas zyrtarëve palestinezë.
Tensionet në Bregun Perëndimor të okupuar mbeten të larta. Sipas Ministrisë së Shëndetësisë, që nga fillimi i luftës në Gaza më 7 tetor 2023, ushtria izraelite dhe kolonët ilegalë kanë vrarë të paktën 923 palestinezë dhe kanë plagosur gati 7.000 të tjerë.
