Dita Botërore e Popullsisë: Sa banorë numëron planeti Tokë?

Planeti Tokë, këtë vit pritet të tejkaloj numrin prej 8 miliardë banorësh. Ky njoftim u bë sot duke e shënuar Ditën Botërore të Popullësisë, ku thuhet se në vitin 2011 bota kishte numëruar një popullësi prej 7 miliardë banorë.

Dita Botërore e Popullsisë festohet çdo vit më 11 korrik për të rritur ndërgjegjësimin për çështjet e popullsisë globale. Mbipopullimi është një shqetësim pasi burimet e botës po shterohen me një rritëm të paqëndrueshëm.

Qëllimi kryesor i kësaj dite është ndërgjegjësimi për të gjitha ndikimet negative që ka rritja e popullsisë në zhvillimin e vazhdueshëm të natyrës.

Mundësi për të gjithë

Kjo ditë u prezantua në vitin 1989 nga Këshilli i atëhershëm Drejtues i Programit të Kombeve të Bashkuara për Zhvillim. Më 11 korrik 1990, kjo ditë u festua për herë të parë në më shumë se 90 vende. Prej atëherë, një sërë zyrash kombëtare të UNFPA-së, si dhe organizata dhe institucione të tjera, në bashkëpunim me qeveritë dhe shoqërinë civile, kanë festuar Ditën Botërore të Popullsisë.
Tema e këtij viti është "Një botë prej 8 miliardësh: Drejt një të ardhmeje të qëndrueshme për të gjithë - Shfrytëzimi i mundësive dhe sigurimi i të drejtave dhe zgjedhjeve për të gjithë". Siç thuhet në vetë temën, të gjithë njerëzit në botë nuk kanë të drejta dhe mundësi të barabarta.

“Gratë ende vdesin gjatë lindjes. Boshllëqet gjinore mbeten të rrënjosura. Ndarja dixhitale po lë jashtë linje më shumë gra dhe ato në vendet në zhvillim. Kohët e fundit, vaksinat Covid-19 mbeten të shpërndara në mënyrë të pabarabartë. Të njëjtat shqetësime dhe sfida të 11 viteve më parë mbeten ose janë përkeqësuar: ndryshimet klimatike, dhuna, diskriminimi. Bota arriti një moment historik veçanërisht të zymtë në maj: më shumë se 100 milionë të zhvendosur me forcë në mbarë botën”, thekson UNFPA.

Deri në vitin 2050 një rritje prej 30 për qind

Një pjesë e madhe e popullsisë së botës vazhdon të jetë viktimë e diskriminimit, ngacmimit dhe dhunës. Për shkak të problemit të mbipopullimit, pabarazia gjinore dhe shkeljet e të drejtave të njeriut janë më të zakonshme se kurrë në vendet në zhvillim, thonë nga Departamenti i Kombeve të Bashkuara për Çështjet Ekonomike dhe Sociale

"Megjithëse rritmi i rritjes së popullsisë globale do të vazhdojë të bjerë në dekadat e ardhshme, popullsia e botës ka të ngjarë të jetë midis 20 dhe 30 për qind më e madhe në 2050 sesa në 2020."

"Por, fokusi duhet të jetë tek njerëzit, jo tek popullsia. Duke i llogaritur njerëzit si numër iu rrëmbeu atyre humanitetin. Në vend se numrat të funksionojnë për sistemet, bëni që sistemet të funksionojnë për numrat duke promovuar shëndetin dhe mirëqenien e njerëzve", thonë nga UNFPA duke shtuar "Në një botë prej 8 miliardë banorësh, duhet të ketë gjithmonë hapësirë për mundësi".