Dita e parë e samitit të liderëve të G7-s, të organizuar nga Italia, përfundoi të enjten me ngjarje të rëndësishme që lidhen me çështje të ndryshme globale.
Në samitin, i cili do të zgjasë deri të shtunën, temat kryesore janë konfliktet globale, rritja e inteligjencës artificiale dhe problemet në Afrikë, me një fokus të veçantë në shqetësimet e vazhdueshme të Italisë për migrimin e pakontrolluar nga ai kontinent drejt Evropës.
Tema të tjera, si ndryshimi i klimës dhe ndikimi i Kinës, janë gjithashtu në axhendën e samitit.
Në margjinat e samitit të liderëve të G7 në rajonin italian të Fasanos, presidenti amerikan Joe Biden dhe ai ukrainas Volodymyr Zelensky nënshkruan një marrëveshje kyç dypalëshe dhjetëvjeçare për bashkëpunimin në mbrojtje.
Udhëheqësit theksuan rëndësinë e marrëveshjes si për sigurinë e NATO-s ashtu edhe për bazën e mbrojtjes së Ukrainës.
Zelensky, i cili e quajti nënshkrimin e marrëveshjes "historike", shprehu mirënjohjen e tij për Presidentin Biden dhe popullin amerikan për mbështetjen e palëkundur në luftën e Ukrainës me Rusinë.
Në një konferencë të përbashkët për shtyp, Biden theksoi se marrëveshja do të rrisë forcën e qëndrueshmërinë së Ukrainës.
Si një nxitje shtesë për mbështetjen ndërkombëtare të Ukrainës, u nënshkrua një marrëveshje dypalëshe sigurie me Japoninë.
Marrëveshja i siguron Ukrainës 4,5 miliardë dollarë ndihmë këtë vit dhe siguron mbështetje të vazhdueshme për dekadën e ardhshme.
Zelensky vlerësoi marrëveshjen, duke theksuar Japoninë si një nga vendet më të avancuara ekonomikisht dhe teknologjikisht në botë dhe duke shprehur mirënjohjen për mbështetjen e saj të palëkundur.
Në samitin e liderëve të G7-ës, u mor vendimi për t'i dhënë Ukrainës një kredi prej 50 miliardë dollarë deri në fund të vitit 2024, me përdorimin e të ardhurave nga interesi nga aktivetet e ngrira të Bankës Qendrore të Rusisë.
Që nga fillimi i luftës ruso-ukrainase, vendet perëndimore kanë ngrirë rreth 300 miliardë dollarë asete ruse. Përafërsisht 200 miliardë dollarë nga kjo shumë ndodhen në vendet e Bashkimit Evropian (BE).
Fondet e ngrira gjenerojnë miliarda dollarë të ardhura nga interesi çdo vit. Vendet e G7-ës, veçanërisht Shtetet e Bashkuara të Amerikës, duan t'i përdorin këto të ardhura për të mbështetur Ukrainën.
Britania e Madhe, ShBA-ja dhe Kanadaja së bashku akuzuan Rusinë për ndërhyrje në zgjedhjet e ardhshme presidenciale dhe referendumin për anëtarësimin në Bashkimin Evropian në Moldavi.
Në një deklaratë të mprehtë, të tria vendet akuzuan aktorët rusë për "përhapje të gënjeshtrave" dhe "kërkim për të minuar institucionet demokratike moldave".
G7-ta është një forum jozyrtar që mban një samit vjetor për të diskutuar çështjet e politikës ekonomike dhe të sigurisë. Anëtare janë Kanadaja, Franca, Gjermania, Italia, Japonia, Britania e Madhe dhe ShBA-ja, ndërsa në takime marrin pjesë zyrtarë të Këshillit Evropian dhe Komisionit Evropian.
