Gjermania njoftoi se ka zgjatur kontrollet e përkohshme kufitare me Poloninë, Republikën Çeke dhe Zvicrën deri më 15 dhjetor, në një përpjekje për të ndaluar migrimin e paautorizuar.
Një zëdhënës i ministrisë së Brendshme gjermane tha se zgjatja e kontrolleve kufitare do t’i raportohet Komisionit Evropian në Bruksel, dhe se kontrollet pritet të vazhdojnë, kryesisht përgjatë kufirit gjermano-polak.
Ministrja e Brendshme Nancy Faeser urdhëroi policinë të kryejë kontrolle të palëvizshme kufitare përgjatë kufirit me Poloninë, Republikën Çeke dhe Zvicrën më 16 tetor.
Kontrolle të ngjashme kufitare përgjatë kufirit gjermano-austriak janë vendosur në një bazë të supozuar të përkohshme që nga viti 2015.
“Që nga 16 tetori, rreth 3.300 hyrje të paautorizuara janë zbuluar në kufirin me Poloninë dhe 1.100 hyrje të paautorizuara janë parandaluar”, tha zëdhënësi i ministrisë.
“Qëllimi i kontrolleve është të ndalohet kontrabandimi gjithnjë e më i paskrupullt dhe brutal i migrantëve”, shtoi ai.
Zakonisht nuk ka kontrolle të rregullta kufitare ose kontrolle dokumentesh përgjatë asnjërit prej kufijve të Gjermanisë pasi të gjithë fqinjët e vendit janë në zonën Shengen pa viza.
