Ish-kryeministri i Izraelit, Ehud Olmert, tha: "Po shkojmë drejt luftës civile", pasi Parlamenti miratoi rregulloren gjyqësore, e cila shkaktoi protesta masive në gjithë vendin.
Olmert bëri një vlerësim për "Channel 4" britanik në lidhje me rregulloren e diskutueshme gjyqësore të miratuar nga qeveria e kryeministrit Benjamin Netanyahu nëpërmjet Parlamentit.
I njohur për mbështetjen e tij për protestat që kanë vazhduar që nga janari kundër ligjit që do të heqë kontrollin e Gjykatës së Lartë mbi ekzekutivin në Izrael, Olmert tha: "Ky është një kërcënim më serioz se kurrë më parë. Ne po shkojmë drejt luftës civile".
"Qeveria ka vendosur të kërcënojë themelet e demokracisë izraelite dhe kjo është diçka që ne as nuk mund ta pranojmë dhe as ta tolerojmë", tha ai.
Rregullorja e diskutueshme gjyqësore
"Reforma gjyqësore" e shpallur nga ministri izraelit i Drejtësisë, Yariv Levin, më 5 janar përfshin projektligje të ndryshme si kufizimi i kompetencave të Gjykatës së Lartë dhe fuqia për të pasur fjalë në emërimet gjyqësore.
Kryeministri Netanyahu më 27 mars njoftoi se ka shtyrë rregulloren gjyqësore, e cila çoi në rritje të protestave dhe grevave masive në gjithë vendin, por tha se do të rikthenin rregulloren gjyqësore në agjendë pasi të miratohej buxheti 2023-2024 nga Parlamenti në fund të majit.
Qeveria kohët e fundit kishte shtypur sërish butonin për reformën në drejtësi pas ngecjes së negociatave me opozitën. Më shumë se 10 mijë rezervistë në Izrael njoftuan se do të largoheshin nga detyra e tyre e ushtrisë vullnetare për të protestuar kundër rregullores gjyqësore të qeverisë.
Emrat që mbanin poste të larta në politikë, ushtri, siguri, ekonomi dhe gjyqësor në Izrael deklaruan se ishin kundër rregullores gjyqësore të qeverisë. Protestat kundër rregullores gjyqësore të qeverisë së Netanyahut në Izrael vazhdojnë prej 7 muajsh.
