Kancelari austriak Karl Nehammer deklaroi të shtunën se do të japë dorëheqjen në ditët në vijim, pasi dështuan negociatat për formimin e një qeverie të re.
Njoftimi erdhi pasi Partia Popullore Austriake (OVP) e Nehammerit dhe Socialdemokratët e qendrës së majtë (SPO) vazhduan negociatat për koalicionin një ditë pas tërheqjes së papritur të partisë liberale Neos nga bisedimet.
Nehammer deklaroi se negociatat ishin të gjata dhe të ndershme, por nuk ishte e mundur të arrihej marrëveshje mbi çështjet kryesore. Ai shtoi se negociatat po ndërpriten dhe nuk do të vazhdojnë.
OVP, SPO dhe Neos u përpoqën të formonin një koalicion trepalësh pasi partia e ekstremit të djathtë, Partia e Lirisë së Austrisë (FPO), fitoi zgjedhjet kombëtare në shtator të vitit të kaluar.
Sondazhet e opinionit publik tregojnë se mbështetja për FPO-në është rritur që nga 29 shtatori, kur fitoi 29 për qind të votave në zgjedhje. Kryetari i FPO-së, Herbert Kickl, i quajti negociatat për koalicion, të cilat sipas tij kishin për qëllim krijimin e një “koalicioni humbësish”, si jodemokratike.
