Këshilli i BE-së ka filluar një samit për të vendosur se kush do të plotësojë postet kryesore në bllok, por edhe për të nënshkruar marrëveshjet e sigurisë me Ukrainën.
Samiti dyditor vjen pasi qytetarët evropianë hodhën votat e tyre për të përcaktuar përbërjen e Parlamentit Evropian më 6-9 qershor, me partitë e krahut të djathtë që fituan më shumë vende, por nuk fituan kontrollin.
Agjenda e samitit përfshin çështje të tilla si ndihma ushtarake për Ukrainën, vizioni për mandatin e ardhshëm 5-vjeçar, situatën në Lindjen e Mesme, migracionin, mbrojtjen dhe sigurinë, si dhe postet kryesore në bllokun evropian.
Presidenti ukrainas, Volodymyr Zelenskyy, në rrjetin social X tha se do të nënshkruajnë "tri marrëveshje të sigurisë, duke përfshirë një me BE-në në tërësi".
"Për herë të parë, kjo marrëveshje do të përmbajë angazhimin e të 27 vendeve anëtare për t’i ofruar Ukrainës mbështetje të gjerë, pavarësisht nga çdo ndryshim i brendshëm institucional", tha Zelenskyy.
Në fjalët në hyrje së bashku me presidentin e Këshillit të BE-së, Charles Michel, presidenti Zelenskyy falënderoi Michelin dhe "të gjithë liderët e BE-së" për një rezultat të tillë historik.
"Ne pritëm këtë periudhë të gjatë kohore, po. Dhe të gjithë, civilët dhe sigurisht edhe heronjtë tanë në fushën e betejës, ju e dini se si ne duam të jemi në BE", tha ai.
Presidenti ukrainas i referohej vendimit të BE-së për hapjen e bisedimeve të anëtarësimit me Ukrainën.
"Dhe, sigurisht, ne duhet të punojmë në hapat e ardhshëm. Ju gjithmonë thoni se ne jemi shumë të shpejtë, por ne kemi nevojë. Ne do të diskutojmë sot me udhëheqësit për këtë, për hapat tanë të ardhshëm", tha ai.
Zelenskyy gjithashtu përsëriti urgjencën për më shumë mbrojtje ajrore për Ukrainën derisa lufton kundër një lufte ruse, që tani po i afrohet kufirit 2-vjeçar.
