Sekretari amerikan i Shtetit, Marco Rubio, mbërriti në Izrael të shtunën mbrëma në vizitën e tij të parë në Lindjen e Mesme.
Ai u prit në Aeroportin Ndërkombëtar Ben Gurion nga ministri i Jashtëm izraelit, Gideon Sa’ar, i cili ndau një foto në llogarinë e tij në X.
Diplomati amerikan do të zhvillojë takime të dielën me zyrtarët më të lartë izraelitë, përfshirë kryeministrin Benjamin Netanyahu.
Pas vizitës në Izrael, Rubio do të udhëtojë në Arabinë Saudite dhe Emiratet e Bashkuara Arabe për të takuar zyrtarë të lartë dhe për të diskutuar bashkëpunimin rajonal, stabilitetin dhe paqen.
Sipas Departamentit të Shtetit, vizita do të fokusohet në lirimin e pengjeve amerikane dhe të tjerëve të mbajtur nga Hamasi, avancimin në Fazën II të marrëveshjes së armëpushimit në Gaza dhe kundërshtimin e “aktiviteteve destabilizuese të regjimit iranian dhe përfaqësuesve të tij.”
Vizita e Rubios vjen ndërsa presidenti amerikan Donald Trump ka propozuar të “marrë nën kontroll” Rripin e Gazës, të zhvendosë palestinezët në Egjipt, Jordani dhe vende të tjera, dhe ta shndërrojë atë në “Rivierën e Lindjes së Mesme.”
Kjo ide është refuzuar nga bota arabe dhe shumë vende të tjera, të cilat e konsiderojnë atë një formë të spastrimit etnik.
