Deklarata përfundimtare e shumëpritur nga samiti i NATO-s në Uashington e përshkroi si "të pakthyeshme" rrugën e Ukrainës për t’iu bashkuar aleancës transatlantike prej 32 anëtarësh dhe i kërkoi më tej Kinës t’i japë fund ndihmës së saj për luftën e Rusisë ndaj fqinjit të saj evropian lindor.
Aleatët e NATO-s kanë diskutuar dhënien e garancive që ata i kanë quajtur "urë" drejt anëtarësimit për Ukrainën, ndërsa liderët u mblodhën për samitin e tyre të radhës, ndërkohë që deklarata e tyre thotë se vendimet e marra gjatë takimit dhe Këshillit NATO-Ukrainë, i cili do të mblidhet sot, kanë duke mundësuar atë platformë.
Në deklaratë thuhet se Kievi ka bërë "përparim konkret" në një seri reformash demokratike, politike dhe ushtarake që duhet të përfundojë për anëtarësim dhe me gjuhën më konkrete deri më tani theksohet se Ukraina përfundimisht do t’i bashkohet aleancës.
"E ardhmja e Ukrainës është në NATO", thuhet në deklaratë.
"Ndërsa Ukraina vazhdon këtë punë jetike, ne do të vazhdojmë ta mbështesim atë në rrugën e saj të pakthyeshme drejt integrimit të plotë euroatlantik, duke përfshirë anëtarësimin në NATO", thekson deklarata përfundimtare.
Në të thuhet se Rusia "mbetet kërcënimi më domethënës dhe më i drejtpërdrejtë për sigurinë e aleatëve". Pushtimi tashmë dyvjeçar i Ukrainës, thotë dokumenti, "ka shkatërruar paqen dhe stabilitetin në zonën euro-atlantike dhe ka dëmtuar rëndë sigurinë globale".
Aleatët e NATO-s u zotuan t’i sigurojnë Ukrainës mbi 43 miliardë dollarë fonde brenda vitit të ardhshëm dhe të "sigurojnë nivele të qëndrueshme të asistencës për sigurinë që Ukraina të triumfojë".
Aleanca tha se Irani dhe Koreja e Veriut po "ushqejnë" luftën ruse duke i ofruar Moskës "mbështetje të drejtpërdrejtë ushtarake" që përfshin dronë dhe municione ushtarake.
Por, ajo nënvizoi veçanërisht Kinën, për të cilën tha se "është bërë nxitës vendimtar i luftës së Rusisë kundër Ukrainës përmes të ashtuquajturit partneritet ‘pa kufij’ dhe mbështetjes së saj në shkallë të gjerë për bazën industriale të mbrojtjes ruse".
"I bëjmë thirrje Republikës Popullore të Kinës, si anëtare e përhershme e Këshillit të Sigurimit të Kombeve të Bashkuara me një përgjegjësi të veçantë për të mbështetur qëllimet dhe parimet e Kartës së OKB-së, të ndërpresë çdo mbështetje materiale dhe politike për përpjekjet luftarake të Rusisë", tha aleanca.
"Kjo përfshin transferimin e materialeve me përdorim të dyfishtë, të tilla si komponentët e armëve, pajisjet dhe lëndët e para që shërbejnë si inpute për sektorin e mbrojtjes së Rusisë. Kina nuk mund të mundësojë luftën më të madhe në Evropë në historinë e fundit pa ndikuar negativisht në interesat dhe reputacionin e saj", theksohet në deklaratën përfundimtare.
Samiti i ardhshëm i nivelit të liderëve të NATO-s do të zhvillohet në Hagë të Holandës, në qershor 2025.
