Sulmet ruse ndaj caqeve të caktuara ukrainase janë një përgjigje e detyruar dhe e pashmangshme ndaj provokimeve të Kievit, i tha presidenti rus Vladimir Putin të premten kancelarit gjerman Olaf Scholz.
“Në një bisedë telefonike me Scholz-in, Putin thirri vendet perëndimore, përfshirë Gjermaninë, për veprimet e tyre shkatërruese si furnizimi i regjimit në Kiev me armë dhe trajnimi i ushtrisë ukrainase”, thuhet në deklaratën e Kremlinit.
Ai detajoi qëllimet e "operacionit special ushtarak" të Rusisë në Ukrainë dhe i bëri thirrje Gjermanisë të rishqyrtojë pozicionin e saj për konfliktin.
Putin pretendon se mbështetja gjithëpërfshirëse politike dhe financiare e Perëndimit për Ukrainën është arsyeja pse "Kiev e refuzon plotësisht idenë e çdo negociate".
“Përveç kësaj, ajo inkurajon nacionalistët radikalë ukrainas që të kryejnë gjithnjë e më shumë krime të përgjakshme kundër civilëve”, shtohet në deklaratë.
Putin theksoi se forcat ruse janë përmbajtur prej kohësh nga synimi i objektivave të caktuara në Ukrainë, por se masa të tilla tani janë bërë një përgjigje e detyruar dhe e pashmangshme ndaj sulmeve provokuese të Kievit ndaj infrastrukturës civile ruse, duke përfshirë urën e Krimesë dhe objektet energjetike.
Ai tha se “sulmet terroriste në tubacionet e gazit Nord Stream janë gjithashtu pjesë e këtyre provokimeve”, duke përsëritur thirrjen e Moskës për një hetim transparent që përfshin Rusinë.
Deklarata shtoi se, në lidhje me marrëveshjen e eksportit të drithit, Putin theksoi nevojën për zbatimin gjithëpërfshirës të saj, që përfshin heqjen e të gjitha barrierave për furnizimet ruse.
Tërheqja nga Ukraina nuk është opsion
Nga ana tjetër, zëdhënësi i Kremlinit, Dmitry Peskov ka bërë të ditur se Rusia nuk është e gatshme për negociata me ShBA-në nëse kushti për këtë është tërheqja nga Ukraina, por presidenti rus Vlladimir Putin mbetet i hapur për kontakte.
Zëdhënësi i Kremlinit Dmitry Peskov e bëri njoftimin një ditë pasi presidenti amerikan Joe Biden tha se është i gatshëm të bisedojë me presidentin rus nëse ai tregon interes për t'i dhënë fund luftës të cilën e filloi në shkurt.
"Operacioni special ushtarak vazhdon. Por, sigurisht, mënyra më e dëshirueshme për të arritur interesat tona është nëpërmjet mjeteve paqësore, diplomatike", tha Peskov në Moskë.
Ai rikujtoi se para fillimit të "operacionit special ushtarak", Putin u përpoq të zbuste shqetësimet nëpërmjet mjeteve paqësore, përpjekjeve diplomatike, por nisma e tij nuk gjeti mirëkuptim në ShBA, NATO dhe Organizatën për Bashkëpunim dhe Siguri në Evropë.
Peskov shtoi se refuzimi i ShBA-së për të njohur territoret e reja ruse e bën të vështirë gjetjen e një gjuhe të përbashkët, duke iu referuar rajoneve ukrainase Luhansk, Donetsk, Kherson dhe Zaporozhye, ku u mbajtën referendume, të cilat Perëndimi i quajti "të rreme".
