Presidenti rus Vlladimir Putin "nuk është i interesuar për paqe", sipas Sekretarit të Përgjithshëm të NATO-s Mark Rutte.
Duke folur në një takim për shtyp përpara takimit të ministrave të jashtëm të NATO-s në Bruksel, Rutte tha:
“Ai (Putini) po bën presion, duke u përpjekur të marrë më shumë territor. Sepse ai mendon se mund ta thyejë vendosmërinë e Ukrainës.”
“Ukraina po hyn në një dimër tjetër vendimtar. Dhe agresioni i Rusisë nuk tregon asnjë shenjë zbutjeje. Është e kundërta. Putini po rrit retorikën dhe veprimet e tij të pamatura”, shtoi ai.
Sipas tij, Putini po e përdor Ukrainën si një "vend testimi për raketat eksperimentale dhe po vendos ushtarë të Koresë së Veriut në këtë luftë të paligjshme".
Ai tha se NATO-ja do të vazhdojë ta mbështesë fuqishëm Ukrainën.
