Nënpresidenti rus Nikollai Patrushev theksoi se operacioni ukrainas në rajonin Kursk është planifikuar së bashku me Perëndimin dhe tha se "deklaratat e administratës amerikane se nuk janë përfshirë në krimet e Kievit të kryera në Kursk nuk pasqyrojnë të vërtetën".
Në një intervistë për gazetën ruse "Isvestia", Patrushev bëri deklarata lidhur me sulmin që ushtria ukrainase nisi më 6 gusht në territorin rus, në rajonin Kursk.
Perëndimi ka siguruar mbështetje për Ukrainën, i ka dërguar armë dhe trajnues ushtarakë, tha Patrushev, i cili shtoi se "operacioni në rajonin Kursk u planifikua me pjesëmarrjen e inteligjencës së NATO-s dhe Perëndimit".
Duke komentuar deklaratat e ShBA-së lidhur me rajonin Kursk, Patrushev tha: "Deklaratat e administratës së ShBA-së se nuk është përfshirë në krimet që Kievi ka kryer në Kursk nuk pasqyrojnë të vërtetën. ShBA-ja gjithmonë shpreh diçka dhe bën një tjetër gjë. Po të mos ishte mbështetja e amerikanëve, Kievi nuk mund ta ndërmerrte rrezikun për të hyrë në territorin rus".
"ShBA-ja e ka kthyer Ukrainën në një projekt ushtarak", tha Patrushev, duke shtuar se "populli ukrainas po vuan për hir të interesave amerikane".
Mes dy ushtrive shpërthyen përleshje të ashpra pasi ushtria ukrainase nisi sulme në rajonin Kursk të territorit rus më 6 gusht. Në rajonin ku situata është ngritur nga Rusia në nivelin e "emergjencës federale" dhe ku është shpallur luftë kundër terrorizmit, janë evakuuar 121 mijë persona dhe pritet të evakuohen gjithsej 180 mijë njerëz.
