Këshilltari i Sigurisë Kombëtare të Shtëpisë së Bardhë, Jake Sullivan, përparimin e opozitës siriane në Halep dhe rrethinat e saj ia atribuoi humbjes së fuqisë dhe shpërqendrimit të mbështetësve të Sirisë në konflikte të tjera.
Lidhur me marrjen e Halepit nën kontroll nga forcat opozitare siriane, Sullivan në deklaratën për kanalin e lajmeve CNN tha: "Prej tre vitesh ata shikuan tre aktorë që kanë dëmtuar veten: Irani, Rusia dhe Hezbollahu. I panë ata më të dobët dhe më të pambrojtur se sa më parë dhe u përpoqën të përfitonin nga kjo".
"Shpejtësia e këtij sulmi befasoi shumë regjimin sirian dhe vëzhguesit e tjerë në rajon", tha Sullivan duke theksuar se si këto zhvillime si dhe situata aktuale në Ukrainë janë "rezultat i natyrshëm që Rusia dhe Irani të ndodhen në një pozicion më të dobët strategjik".
Në pyetjen nëse zhvillimet e fundit në qytetet siriane Halep dhe Idlib përbëjnë rrezik për forcat amerikane në rajon Sullivan tha: "Forcat tona të dislokuara aktualisht në Siri për të luftuar DEASh-in nuk janë në rrezik të afërt pasi ato janë në vendndodhje të ndryshme nga zona ku ndodh ky sulm. Megjithatë, ato janë ende nën kërcënim nga grupet e milicisë shiite në Iran, Irak dhe Siri. Punojmë për të siguruar mbrojtjen e tyre dhe për t'iu përgjigjur sulmeve".
Duke nënvizuar se ShBA-ja e ka përcaktuar grupin e armatosur kundër regjimit sirian, Hayat Tahrir al-Sham (HTS) si organizatë terroriste, Sullivan tha se për këtë arsye ata kanë shqetësime të vlefshme "për planet dhe qëllimet e organizatës".
Sullivan theksoi se pavarësisht kësaj, ShBA-ja "nuk do të ankohet" për avancimin e opozitës drejt kryeqytetit të Sirisë, Damaskut, duke ushtruar presion ndaj regjimit të Asadit, të mbështetur nga Rusia, Irani dhe Hezbollahu.
Ai tha se "është një situatë komplekse" se çfarë do të sjellin zhvillimet. Sullivan thotë se Uashingtoni është në kontakt të ngushtë me partnerët e tij rajonalë për këtë çështje.
Prej rreth 6 ditësh ka pasur përleshje mes regjimit të Asadit dhe grupit të armatosur kundër regjimit HTS në provincat e Halepit dhe Idlibit.
