Shefi i Hamasit, Ismail Hanije, zhvilloi bisedime me ministrin e Jashtëm në detyrë të Iranit, Ali Bagheri në Katar për të diskutuar mënyrat për t'i dhënë fund luftës së Izraelit në Rripin e Gazës, njoftoi të enjten grupi palestinez i rezistencës.
Mes dy palëve të mërkurën në mbrëmje u diskutuan zhvillimet dhe përpjekjet palestineze për të ndalur sulmin izraelit në Gaza, shtoi Hamasi në një deklaratë.
Bagheri shqyrtoi përpjekjet iraniane për të mbështetur palestinezët në arenat ndërkombëtare, duke përfshirë Organizatën e Bashkëpunimit Islamik, bllokun BRICS i vendeve me ekonomi të mëdha në rritje dhe Organizatën e Bashkëpunimit të Shangait, thuhet në deklaratë.
Bisedimet indirekte midis Izraelit dhe Hamasit të ndërmjetësuara nga SHBA, Katari dhe Egjipti deri më tani nuk kanë arritur të bien dakord për një armëpushim të përhershëm që mundëson një shkëmbim të të burgosurve midis dy palëve.
Duke shpërfillur një rezolutë të Këshillit të Sigurimit të OKB-së që kërkon një armëpushim të menjëhershëm, Izraeli është përballur me reagim ndërkombëtar në mes të ofensivës së tij brutale të vazhdueshme në Gaza që nga një sulm i 7 tetorit 2023 nga Hamasi.
Më shumë se 37.400 palestinezë janë vrarë që atëherë në Gaza, shumica prej tyre gra dhe fëmijë, dhe më shumë se 85.600 të tjerë janë plagosur, sipas autoriteteve lokale shëndetësore.
Mbi tetë muaj pas luftës izraelite, pjesë të mëdha të Gazës janë në gërmadha mes një bllokade të rreptë të ushqimit, ujit të pastër dhe ilaçeve.
Izraeli akuzohet për gjenocid në Gjykatën Ndërkombëtare të Drejtësisë, vendimi i fundit i së cilës urdhëroi Tel Avivin të ndalojë menjëherë operacionin e tij ushtarak në qytetin jugor të Rafahut, ku mbi një milion palestinezë kishin kërkuar strehim nga lufta përpara se të pushtohej më 6 maj.
