Përfaqësuesja Speciale e Sekretarit të Përgjithshëm të Kombeve të Bashkuara (OKB) dhe Shefja e Misionit të Përkohshëm të Kombeve të Bashkuara në Kosovë (UNMIK), Caroline Ziadeh, pas zhvillimeve të fundit në Kosovë, bëri thirrje për "udhëheqje të përgjegjshme". Zëvendëszëdhënësi i Sekretarit të Përgjithshëm të OKB-së, Farhan Haq, iu përgjigj pyetjeve të gazetarëve në konferencën e përditshme për media.
Haq ndau shqetësimet e shefes së UNMIK-ut për zhvillimet e rrezikshme në Kosovë, duke vënë në dukje se Ziadeh "bëri thirrje për udhëheqje të përgjegjshme për të mbrojtur qetësinë dhe sigurinë e të gjitha komuniteteve."
Duke theksuar se "zhvillimet vazhdojnë të ndikojnë negativisht në jetën e përditshme dhe të drejtat socio-ekonomike të komuniteteve në rajon", Haq tha se "kjo përfshin edhe mbylljen e nëntë degëve të Postës Serbe në komunat veriore nga autoritetet në Prishtinë".
Farhan Haq transmetoi gjithashtu thirrjet e Ziadeh për zgjidhjen e "problemeve të jashtëzakonshme" përmes kanaleve të dialogut të mundësuar nga BE-ja dhe shmangien e veprimeve të njëanshme.
Policia e Kosovës njoftoi se më 5 gusht në një operacion në veri të Kosovës, me vendim të autoritetit kompetent, mbylli nëntë degë të Postës së Serbisë "mbi dyshimin e bazuar se të njëjtat kanë operuar pa licencë dhe nuk kanë qenë të regjistruara në institucionet përkatëse të Republikës së Kosovës".
Mbyllja e degëve të postës u dënua në njoftimin e publikuar nga Lista Serbe, partia më e madhe serbe në Kosovë, dhe institucionet shtetërore të Serbisë.
