Ndërkohë që lufta mes Rusisë dhe Ukrainës ka arritur në ditën e saj të 1.000-të, pretendimet se armët me rreze të gjatë, të cilat ShBA-ja ka furnizuar Ukrainën, mund të përdoren në territorin e Rusisë, po bëhen gjithnjë e më të pranishme në diskutimet e përditshme. Parashikohet se një skenar i tillë do ta shtyjë konfliktin në një dimension të ri.
Më 24 shkurt 2022, presidenti rus Vlladimir Putin njoftoi fillimin e "operacionit special ushtarak në Ukrainë", dhe që nga ajo datë kanë kaluar 1.000 ditë.
Sipas Putinit, "operacioni special ushtarak" filloi pasi të ashtuquajturat administrata separatiste kërkuan ndihmë ushtarake nga Rusia, ndërkaq arsyeja e operacionit ishte "për të pastruar Ukrainën nga nazizmi dhe militarizmi, si dhe për të sjellë para drejtësisë ata që kanë kryer krime të shumta të përgjakshme kundër civilëve, përfshirë qytetarët e Rusisë".
Ushtria ruse përdor shpesh raketa me rreze të gjatë dhe precizitet të lartë kundër objektivave strategjike në Ukrainë, ndërsa ShBA-ja dhe vendet evropiane kanë shtuar mbështetjen e tyre të armëve për Ukrainën.
Aneksimi i jashtëligjshëm i Donetskut, Zaporizhzhias dhe Khersonit nga ana e Rusisë
Të ashtuquajturat referendume për bashkim me Rusinë u mbajtën në shtator 2022 në Donetsk, Luhansk, Zaporizhzhia dhe Kherson. Shumica e atyre që morën pjesë në referendum i thanë "po" vendimit të aneksimit. Kështu, Rusia aneksoi ilegalisht edhe 15 për qind të territorit ukrainas pas Krimesë.
Ukraina, nga ana tjetër, filloi kundërsulm më 29 gusht 2022 për ta çliruar Khersonin.
Rusia, e cila evakuuoi shumicën e qytetarëve të Khersonit që e kishte aneksuar ilegalisht, njoftoi në nëntor të po atij viti se do të tërhiqej nga linja e mbrojtjes në qytetin e Khersonit, duke u zhvendosur në bregun e majtë të lumit Dnipro. Kështu, forcat ruse u larguan nga qendra e qytetit Kherson.
Sipas të dhënave të OKB-së, 7.832.493 persona nga Ukraina emigruan në vendet evropiane, ndërsa numri i personave të zhvendosur brenda vendit arriti në 11 milionë, ku të paktën 6.755 civilë humbën jetën dhe 10.607 civilë u plagosën.
Negociatat për armëpushim midis Rusisë dhe Ukrainë
Teksa lufta vazhdonte, midis delegacioneve rusë dhe ukrainase u zhvilluan 4 negociata ballë për ballë, 3 në Bjellorusi, ndërsa një në Türkiye.
Në Bjellorusi, të dyja palët ranë dakord vetëm për korridoret humanitare për evakuimin e civilëve nga zonat e konfliktit.
Ndërsa si rezultat i negociatave të zhvilluara në Istanbul më 29 mars 2022, me ndihmë të iniciativave të ndërmjetësimit të presidentit turk Recep Tayyip Erdoğan, pala ukrainase i dorëzoi palës ruse parimet e një marrëveshjeje të mundshme të ardhshme me shkrim dhe palët ishin shumë afër marrëveshjes.
Por, pas pretendimeve në Bucha, bisedimet u ndërprenë. Pala ukrainase theksoi se situata në vend më 17 maj ka ndryshuar shumë dhe se kanë pezulluar negociatat me Rusinë.
Nënshkrimi i Marrëveshjes së Korridorit të Drithit
Nga ana tjetër, Marrëveshja e Korridorit të Drithit, që do të parandalonte krizën ushqimore, u nënshkrua në korrik të vitit 2022 midis Türkiyes, Rusisë, Ukrainës dhe Kombeve të Bashkuara (OKB).
Marrëveshja, e cila u zgjat disa herë në të njëjtin vit, u zgjat për herë të fundit më 17 maj 2023.
Marrëveshja u pezullua më 17 korrik 2023, me tërheqjen e njëanshme të Rusisë.
Me njoftimin e Ukrainës se kishte filluar të përdorte rrugë alternative për dërgesat e grurit përmes Detit të Zi, Rusia intensifikoi sulmet ndaj porteve dhe infrastrukturës së përdorur në eksportet e grurit të Ukrainës.
Kundërsulmi i Kievit në vitin 2023 dhe sulmet me dronë në territorin rus
Me intensifikimin e konfliktit në rajonet Donetsk dhe Zaporizhzhia në vitin 2023, Ukraina nisi kundërofensivë në këto dy rajone në qershor të të njëjtit vit.
Ushtria ukrainase njoftoi se çliroi disa fshatra në rajonin e Donetskut gjatë sulmit që zgjati rreth 6 muaj. Autoritetet ukrainase njoftuan se afërsisht 74 për qind e territorit të vendit është çliruar dhe 26 për qind është ende nën kontrollin rus.
Ndërkaq, vitin e kaluar, tentativa për sulm me mjete ajrore pa pilot (UAV) filluan të bëhen drejtuar territorit rus, veçanërisht në kryeqytetin Moskë.
Rusia e konsideroi Ukrainën përgjegjëse për këto sulme.
Inteligjenca ukrainase mori përgjegjësinë për sulmet me dronë në disa infrastruktura si objektet e depozitimit të naftës dhe bazat ajrore ushtarake në Rusi.
Mbahet Samiti i parë i Paqes
Nën hijen e konfliktit të dhunshëm, në qershor u mbajt Samiti i parë i Paqes për Ukrainën, nën organizimin e Zvicrës.
Në deklaratën përfundimtare të samitit, ku morën pjesë delegacione nga 90 vende dhe organizata, por jo nga Rusia dhe Kina, u theksua se integriteti territorial i Ukrainës duhet të jetë baza e çdo marrëveshjeje të mundshme të paqes.
Presidenti ukrainas, Volodymyr Zelenskyy, në deklaratën e tij në kuadër të samitit, tha se janë të gatshëm të nisin negociatat menjëherë kur Rusia të tërhiqet nga territori ukrainas.
Procesi i anëtarësimit të Ukrainës në BE
Një nga shkaqet se pse Putini filloi agresionin në Ukrainë ishte dëshira e kësaj të fundit për t'u afruar me BE-në dhe NATO-n. Pavarësisht luftës Ukraina nuk hoqi dorë nga anëtarësimi në BE, ndërkaq vitin e kaluar avancoi në këtë drejtim.
Udhëheqësit e vendeve anëtare të BE-së vendosën të fillojnë negociatat për anëtarësim me Ukrainën dhe Moldavinë në dhjetor 2023.
Dorëzimi i avionëve të parë F-16 dhe leja e ShBA-së për përdorimin e raketave në territorin rus
Që nga fillimi i luftës, vendet perëndimore kanë vazhduar mbështetjen e tyre me armë ndaj Ukrainës, ndërsa njoftuan edhe dorëzimin e avionëve të parë F-16.
Zelenskyy, në postimin në llogarinë e tij në mediat sociale më 4 gusht, tha: "F-16 janë në Ukrainë".
Më tej, gjatë luftës Ukraina pretendoi se Rusia solli trupa nga Koreja e Veriut për të luftuar në territorin e saj. Pas këtij zhvillimi ShBA-ja vendosi të lejojë përdorimin e armëve amerikane me rreze të gjatë veprimi në territorin rus.
Kremlini, nga ana tjetër, e përshkroi vendimin e ShBA-së si "një fazë të re të tensioneve".
Kështu, në ditën e 1.000-të të luftës Rusi-Ukrainë, parashikohet që pretendimet se ShBA-ja do të lejojë përdorimin e armëve me rreze të gjatë nga Ukraina në territorin rus, do ta çojë konfliktin në një dimension të ri.
