Sirianët organizuan protesta të hënën kundër thirrjes së kryeministrit izraelit Benjamin Netanyahu për çmilitarizimin e Sirisë jugore.
"Jo inkursionit izraelit" dhe "Siria jugore është pjesë e Sirisë së lirë" lexonin pankarta të valëvitura nga një numër i madh protestuesish sirianë në provincën Quneitra, sipas videove të shpërndara në mediat sociale.
Protestuesit u mblodhën gjithashtu në sheshin Al-Karama në provincën Suweyda, duke riafirmuar refuzimin e tyre për çdo ndërhyrje në punët e vendit të tyre.
"Poshtë Izraeli", brohoritnin protestuesit në qytetin Bosra al-Sham në Daraa lindore.
"Nga Daraa në Alepo, Siria është një zemër," shkruhet në një pankartë të valëvitur nga demonstruesit gjatë tubimit.
Të dielën, Netanyahu bëri thirrje për çmilitarizimin e plotë të Sirisë jugore në provincat e Quneitra, Daraa dhe Suweyda nga forcat e ushtrisë së re siriane.
“Ne nuk do të tolerojmë asnjë kërcënim për komunitetin Druze në Sirinë jugore,” pohoi ai, duke thënë se ushtria izraelite do të qëndrojë në zonën tampon të Sirisë dhe malin sirian Hermon “Jabal al-Sheikh” për “një periudhë të pakufizuar kohore”.
Pas rënies së regjimit të Bashar al-Assad në dhjetor, Izraeli zgjeroi pushtimin e lartësive siriane të Golanit duke pushtuar zonën mbrojtëse të demilitarizuar, një veprim që shkeli marrëveshjen e shkëputjes së vitit 1974 me Sirinë.
Ushtria izraelite gjithashtu intensifikoi sulmet ajrore duke synuar pozicionet ushtarake siriane në të gjithë vendin.
Përparimet e fundit ushtarake të Izraelit në Lartësitë e Golanit, të cilat i ka pushtuar që nga viti 1967, kanë tërhequr dënimin nga Kombet e Bashkuara dhe disa vende arabe.
