Pas tri vitesh është e qartë, ose të paktën duhet të jetë, se sanksionet e vendosura ndaj Rusisë kanë dështuar, deklaroi ministri i Jashtëm i Hungarisë, Peter Szijjarto.
"Këto masa i kanë shkaktuar dëme të mëdha Evropës, përfshirë edhe vendin tonë. Ekonomia hungareze ka pësuar dëme prej 19 miliardë eurosh," tha ai të hënën përpara nisjes për në takimin e ministrave të Jashtëm të vendeve anëtare të Bashkimit Evropian në Bruksel.
Paralelisht, theksoi Szijjarto, Ukraina vazhdon të ndërmarrë hapa që rrezikojnë sigurinë energjetike të Hungarisë dhe Evropës Qendrore. "Një situatë e tillë nuk mund të vazhdojë më," tha ai.
Ai nënvizoi se sot, në Këshillin e Ministrave të Jashtëm të BE-së, do të votohet nëse Komisioni Evropian do të japë garanci për masa në rast se siguria energjetike e vendeve anëtare të BE-së vihet në rrezik.
Të premten, Hungaria bllokoi sërish rinovimin e sanksioneve të Bashkimit Evropian kundër Rusisë, duke paraqitur një kërkesë të minutës së fundit që Ukraina të hapë sërish tubacionet e gazit dhe të lejojë rrjedhën e gazit rus drejt Evropës.
"Tani që çështja e zgjatjes së sanksioneve është në rendin e ditës, kam tërhequr frenat e dorës dhe kam bërë thirrje që liderët evropianë të kuptojnë se kështu nuk shkon më," deklaroi më parë kryeministri Viktor Orban.
Ai theksoi se Hungaria nuk mund të mbajë mbi supe një barrë kaq të madhe të sanksioneve.
Deklaratat e Orbanit erdhën pak para takimit të zyrtarëve evropianë në Bruksel, ku ata tentuan të miratojnë sërish një paketë gjithëpërfshirëse të sanksioneve të BE-së kundër Rusisë, që përfshin kufizime të rënda tregtare dhe ngrirjen e pothuajse 200 miliardë eurove të aseteve shtetërore ruse. Të gjitha vendet anëtare të BE-së duhet të miratojnë njëzëri zgjatjen e këtyre sanksioneve çdo gjashtë muaj.
